SHILLONG: Madhya Pradesh a·doko donggipa Indore songjinmaoni tourist sakgni, chong·motan Raja Raghuvanshi aro Sonam-ni gimaani ja·man, Sohra jolrango tourist-rangko sokachakanio nirok sandiani aro dingtang dingtang kamrangko namdapatna tik ka·angaha.
Iani bidingo jinma chanchirimna gita dingtangmancha Sohra-ni Sub-Divisional Officer (SDO) Mark Andrew Challam-ni dilanichi Sohra-o tom·aniko ong·atangaha aro ia tom·anio, homestay nokgiparang, songni nokni dilgiparang, dingtang dingtang dolrang aro official-rangko man·chape sak 200-na baten manderang bak ra·angtokaha.
Ia tom·aniko dakdilangengon, Sohra-o tourist-rangko sokachakani niamrang, chel·chakaniko on·ani, a·bri doanio niamrangko aro nirikkiani cholrangko namdapatna gita Challam, didianiko on·angaha.
Tourist-rangni chel·gipa biaprangona ja·achi re·ramanirangko name nirikkina gita maming cholrang dongkujaengani giminba ia tom·anio chanchirimangaha.
Indore songjinmaoni re·bagipa tourist saksani siani aro sakgipin tourist-ni gimakuengani gimin aro iana skang Hungary a·songoni re·bagipa tourist saksana ong·gipa a·selni gimin janapatengon, a·bri doanirango niamrangko ra·gatna nangengani gimin, tourist-rangko segatanio kamrangko nambatatna nangengani gimin aro dingtang dingtang agency-rangni gisepo agangrikna man·ani cholrangko ra·gatna nangengani gimin Sohra-ni Sub-Divisional Police Officer (SDPO) Pynhun Syiem janapangskaaha.
Ia tom·anio Orange Roots minggipa restaurant-ni nokgipa Debashish Joel Ryan Shati-ba aganprakengon, ia a·selna jolo songdongenggipa manderangba kalimani aro jajrengchakanio bak on·paenga ine aganaha.
“Tourist-rangko sokachakanio songni nokni manderangan bak ong·pana nangchongmota maina songni manderangan tour guide-ni kamrangko ka·a ong·ode maiba a·selrang ong·genchimoba ta·raken kamrangko ka·na man·a aro ka·dongchakanikoba on·na man·a,” ine Shati aganaha.
Gipin biaprangoni re·baenggipa tour operator-rangni biaprangko name ma·sichenggija tourist-rangko rodilrongani giminba ua suk ong·gijaniko parakataha.
