SHILLONG: Madhya Pradesh a·doko donggipa Indore songjinmaoni bia ka·daldale a·dokona re·bagipa Raja aro Sonam Raghuvanshi-ni gimaangani ja·man, Meghalaya a·dokko ong·gija dake bodnam ka·na jotton ka·ahani gimin aro a·gilsakni nikanio ‘naljokani grigipa biap’ ine mesokna jotton ka·ahani gimin Meghalaya sorkari, mitam national media, YouTuber-rang aro sorkariko matnanggipa manderangni kosako FIR ka·doangaha.
Raja Raghuvanshi-ni sogimin manggisiko man·ani ja·man aro ia mandeni jikgipa gimaangani ja·man, dingtang dingtang national media-rang aro nokdangni manderangba, Meghalaya a·dokko ‘ong·gija kamrangko ka·ronggipa’ gita matnangtokaha aro a·gilsakni nikanio namgija bimingko man·atna jotton ka·tokahachim.
Iani bidingo kobor ra·timgipa manderangna talataniko on·angengon, ia a·selara jikgipani sakgipinko mikchadape, segipako so·otna gita gipin manderangko tik ka·ani a·selsa ong·aha ine a·dokni Cabinet Minister Paul Lyngdoh parakatenba, iani bidingo Meghalaya a·dokko ong·gija dake bodnam ka·na jotton ka·gipa media-rang aro manderangni kosako raken jegalataha.
“Ia a·selni bidingo Meghalaya a·dokko ong·gija dake bodnam ka·na jotton ka·gipa media-rang aro manderangni kosako a·dok sorkari, police-rango FIR ka·aha aro je manderangan Meghalaya a·dok gimikko ong·gija dake matnangna jotton ka·ahachim, uamang pilakkon rim·china gita sorkari, aino pangchake ja·kurangko de·anggen,” ine Lyngdoh aganaha.
Da·o dipet Meghalaya a·dokni pilak tourist spot-rangan manderangna naljokgipa ong·a aro da·o dipet pilak biaprangon tourist-rangni kosako ong·gija dakanirangko knasona man·a dongkuja ineba Tourism Minister aganaha.
Mikkangchiba Meghalaya a·doko gipin biaprangoni re·baenggipa tourist-rangko sokachakangkuaigen ine janapatengon, mikkangchi iandakgipa a·selrangko champengna gita sorkari, tourism-o bak ong·enggipa dolrang baksa chel·chakanirangko baridapatna kam ka·gen ine Lyngdoh parakataha.
Ia case-ko antisani gisepon rim·na man·ahani gimin ua a·dokni police-rangkoba mittelpilangaha.
