Shillong: India a·song gimiko chu·gimik 51 Central University rang donggenchimoba Indian Institutional Ranking Framework (IIRF) 2025 ni ning·o chu·gimik 932.91 index score ko man·paenba North Eastern Hill University (NEHU), Shillong 29 gipa biapko man·aha.
Batanggimin somoi rango NEHU Shillong ko challaianio Vice-Chancellor Prof. Prabha Shankar Shukla baksa skigiparang, aro student organization rangni gisepo meligrikgijanirang ong·enba ma·mong sorkario am·sandianirangko dakchina a·dok sorkario dabianiko dakangahaoba ian dingtangmancha ong·e chu·sokna man·ani ong·aha.
A·doko donggipa University ni ning·o nama skie on·ani, dingtang dingtang am·sandianiko dake chu·sokani, University ning·o skie ra·enggiparangni neng·nikaniko chu·sokatani, aro skie ra·enggiparangni man·dapanirango pangchakenba, IIRF, India a·songni ning·o ia gadangko on·ronga ine official u·iatangaha.
Ia bilsi ni gisepo, Jawaharlal Nehru University, University of Delhi, aro Jamia Millia Islamia University rangan nambatgipa gadango skie on·ani, skie ra·na gita chu·onga nanganirangko man·gipa, aro dingtang dingtang a·bao am·sandianirangko chu·sokatna amgipa ong·e chu·batgipa gadangko man·angaha.
NEHU, Shillong ni ning·o namdapatna nangarang bang·en dongkuoba, a·songni ning·o nambatgipa ge 30 University ni bimungrango dongpae katcha·aniko man·a, ine NEHU, VC aganangaha. Iana agre NEHU, Shillong o bang·a dingtangatanikoba dakenga jechin University ni 29 gipa gadangko man·aniko aro mikkangchi kam ka·na nanganikoba nikatna man·a ine, NEHU, VC u·idapatangaha.
Indake re·baenggipa somoi rango dingtang dingtang skie ra·ani a·barango am·sandianiko namdapatna, skie ra·enggiparangni neng·nikaniko chu·sokatna, aro administration ni kamrangko nambate matchotatna gita NEHU re·mikkangenga ine Prof. Shukla agandapaha.
Una agre NEHU ni IIRF ranking o 29 gipa gadangko man·paanichi salgro-salaram jolo skie ra·anirangko namdapatan baksa India a·songo University rangni bimangko namdapatna dakchakgipa ba ong·a.
