TURA: West Garo Hills a·jani Gomaijhora aro Old Bhaitbari jolrango bijoli sirongengani a·sel songni nokni manderang neng·nikanirangko chagrongna nangtokenga ine Fight Against Corruption (FAC) minggipa dol, Phulbari-o donggipa FEDCO Limited-ni Sub-Divisional Manager-na badi ka·doangaha.
FEDCO-ni Sub-Divisional Manager-na FAC dolni badi ka·e sedoatani gitade, ia jolrango salantian maming a·sel griba bijoli sirongenga aro iani a·selan da·o gita chaktopilgija ding·ani somoirangode songni nokni manderang neng·nikanirangko chagrongna nangtokenga.
Ia jolrango bijoli tarie on·gipa lineman-rang kamtangtangko name ka·jaengani a·selba bijoli nosto ong·ani somoirango bijolirangko tarie on·giparang dongjani a·sel neng·nikanirangko chagrongna nangtokenga ineba FAC matnangataha.
“Ia jolrango bijoli tarina dongipa lineman-rang, kamtangtangko ka·na gisik nangtokjaenga aro uandaken rang·gitik bijolirang nosto ong·ani somoirangoba kam ka·gipa manderangko man·jae somoi gita bijolirangko man·piljaenga. Ia jolrango bijoli jakkalenggipa manderang pilakan an·tangtangni bijoli bill-rangko somoi gitan gamtokpaengoba ia jolrango ru·uta somoirangna bijolirangni sianirangko chakna nangrongenga,” ine FAC-ni dilgiparang parakataha.
Phulbari, Shyamnagar aro Garorangni songdonggipa biaprangode iandake bijolini sianirangko nikna man·rongja indiba Gomaijhora aro Old Bhaitbari jolrangode salantian maming a·sel gri bijoli sirongaia ineba FAC matnangataha.
Indake ong·engon, kamtangko name ka·na gisik nangjaenggipa lineman-rangni kosako sandirokanirangko dakchina aro nanga gita ja·kurangko de·china FAC dabiangenba, Gomaijhora aro Old Bhaitbari jolrango maming neng·nikani gri bijoliko man·pana gita bijoliko nambate nirokchina FEDCO Limited-ni Sub-Divisional Manager-ko didiataha.
