SHILLONG: Meghalaya a·doko bobil dake chakatenggipa Hynniewtrep National Liberation Council (HNLC) dolko tom·tomaona rimbapilna gita sorkari, do·gako oe donengkua indiba bobil dolni ong·gija dakgipa kamrangkode nie dongskajawa ine a·dokni Deputy Chief Minister aro Home Minister Prestone Tynsong parakataha.
HNLC bobil dolni manderang, tangka paisarangko dabie ra·enga ine matnanganirangna ua iako aganchakaha.
Iani bidingo kobor ra·timgipa manderang baksa agangrikengon, HNLC bobil dolko tom·tomaona re·bapilatna gita sorkari baksa agangrikechina changni chang ong·kamataha indiba da·alonan bobil dolni aganchakanirangko sorkari man·sokujaenga ine Tynsong parakataha.
Sorkari baksa apsan asonge agangrikna nangnikenga ong·ode HNLC bobil dolna da·oba sorkari, do·gako oe donengkua ineba Deputy Chief Minister talataniko on·angaha.
“Chinga da·oba uamangna do·gako oe donengkua aro uamang sorkari baksa agangrikna nangnikenga ong·ode re·bana man·aigen. HNLC bobil dolko a·dok sorkarisan ong·aigija ma·mong sorkariba, agangrikaniona re·bachina nangnikenga,” ine Tynsong aganaha.
Bading chiwale cha·enggipa manderangna HNLC, tangka dabiani lekkarangko on·enga ine matnanganirangna aganchakaniko on·angengon, indakgipa kamrangkode champengna gita sorkari tarie dongenga ine Tynsong aganaha.
“Tangka dabie ra·ani ba uandake ong·gija kamrangkode chinga nie dongna man·skajawa,” ine ua aganaha.
“Bobil dol baksa agangrikna cholko on·engoba chinga ong·gija dakgipa kamrangkode nie dongna man·skajawa aro manderangoniko iandake tangka dabie ra·anirangko champengna chinga nirikkie dongenga,” ine Deputy CM aro Home Minister Tynsong aganaha.
