SHILLONG: Meghalaya a·doko National People’s Party (NPP)-chi dilenggipa Meghalaya Democraric Alliance (MDA) sorkari, bang·en namroro silroroanirangko ra·bana man·aha ine MDA-o bak ong·enggipa a·dokni Bharatiya Janata Party (BJP) mittelpilangaha.
“MDA sorkari namen kam ka·enga. An·ching a·doko bang·en namroro silroroanirangko nikna man·engahani gimin MDA sorkarini kamrang namenga,” ine BJP-ni state president Rikman G Momin, kobor ra·timgiparangna aganaha.
A·dokni Chief Minister aro NPP-ni national president Conrad K Sangma-koba ua mittelpilangaha.
“An·chingni chief minister Conrad Sangma, raken kamrangko ka·enga aro chingaba sorkarini bak ong·e, chingni man·a gitade uamangna dakchakanirangko on·paenga,” ine Momin aganaha.
BJP-ni ning·o adita meligrikgijanirang donga ine matnangenggipani bidingo aganchakaniko on·angengon, election-o susana party tikit man·gijagipa adita sak dilgiparangsa, party-ni ning·o matnanganirangko dakaha ine BJP-ni state president parakataha.
“Ua somoiode uamang state president-kosa matnangtokaha. Ua somoirango adita meligrikgijanirang dongachim indiba da·ode chingni gisepo namgriktokpilaha. Chinga ma·mongni pilak program-rangkon ja·rikenga aro ku·cholsan ong·e kamrangko ka·enga,” ine Momin aganaha.
Gitcham MLA-rangko man·chape adita sak dilgiparang, BJP-o napna miksongenga ine koborrangko man·soani gimin janapatskaengon, “Chinga pilakkon chingni party-ona rimchaksoenga. An·ching ku·cholsan ong·e party-na aro a·dokna kamrangko ka·na man·gen,” ine BJP-ni state president parakataha.
