TURA: West Khasi Hills a·jani Khalu songo Rongkai chibimako kabatgipa hanging bridge ba jal·langko 2022 bilsio chi banani somoio nosto ka·angani a·sel songni nokni manderang re·ruraanirango neng·nikanirangko chagrongna nangtokenga ine All Khasi Hills Nokma Welfare Association (AKHNWA) parakatenba, ia jal·langko taripilna man·na gita CMRF ba CMSDF-oniko tangka paisarangko dakchake on·atchina a·dokni Chief Minister Conrad K Sangma-ko didiataha.
AKHNWA-ni parakatani gitade, Khalu A songo donggipa ia jal·langara, West Khasi Hills aro Rongkai chibima paksao donggipa South Garo Hills a·jani dingtang dingtang songrangko nangdimeatgipa jal·lang ong·achim indiba da·o ia jal·lang namangjaengahani a·sel re·ruraenggipa manderangna, mongsongbate skulrangchi re·enggipa bi·sarangna kenchakna nangani ong·engahachim.
“Ia jolrango Khalu A songosan deficit lower primary skul damsasan dongaia aro South Garo Hills a·jao donggipa dingtang dingtang songni bi·sarangba ia skulon poraitokpaenga. Ia bi·sarang, skulona ia namangjaenggipa jal·lang gitan re·rurana nangtokenga aro ian bi·sarangna namen kenchakna nangani ong·engaha,” ine AKHNWA parakatenba, ia jal·langko taripilna gita tangka paisarangko dakchake on·atchina Chief Minister-ko mol·molataha.
Ia jolrango donggipa damdok songni manderang, bazar anti cha·na aro dingtang dingtang kamrangnaba ia jal·lang gitan Rongkai chibimako ga·bate re·na nangtokenga ine janapatskaengon, ia jal·lang 2022 bilsio chi banani somoion nosto ka·ako man·ahaoba da·alonan taripile on·na dongkujaenga ine AKHNWA parakatenba, ia jolrango songdongenggipa manderangni namgnina ia jal·langko ta·raken taripilna man·na gita tangka paisarangko dakchake on·china Chief Minister-ko mol·molataha.
