SHILLONG: Indore songjinmaoni re·bagipa Raja Raghuvanshi-ko so·otani bidingo sandirokani bak gita Mongolbar salo Meghalaya Police-ni Special Investigation Team (SIT), ia a·selna rim·ako man·gipa Sonam Raghuvanshi aro gipin sakbri manderangko Sohra (Cherrapunji)-ona rimange, sing·sandianirangko dakangaha.
So·ota man·gipa Raja Raghuvanshi-ni manggisiko re·anggipa June 2 tariko, Wei Sawdong Falls sambaoniko man·ahani gimin rim·a man·gipa mande sakbongako Mongolbar salo SIT aro Forensic official-rang, ia biaponan rimange, uko maikai so·otaha, uarangni bidingo sing·sandiangaha.
Ia biapona re·anganio SIT aro Forensic dolrang baksana State Disaster Response Force (SDRF) aro Meghalaya Police-ni sipairangba dongpaaha aro Raja-ko maikai so·otahachim, ia biap gimikkon name sale ra·aha.
Ia exercise-ko dakanichi, mongsonggipa sakkirangko aro matnanga man·gipa manderangni ku·rachakanirangko nipilna dakchakgen ine police official aganaha.
Police official-ni aganani gitade, Raja Raghuvanshi-ko Wei Sawdong Falls-ni parking lot-o so·otna nanga ine chanchichipengani gimin police-rang, ia biaprangonin sandirokaniko a·bachengataha.
Raja Raghuvanshi-ko so·otanio jakkalgipa atte ponggniko matnanga man·gipa manderang, Guwahati-oniko brebaaha aro iako police-rang, ua biap sambaonikon man·aha ine East Khasi Hills a·jani Superintendent of Police (SP) Vivek Syiem aganaha.
“Raja-ko so·otna gita Guwahati-oniko brebagipa atte ponggniko chinga man·aha. Ia a·selni bidingo sandirokenggipa SIT, dongimin somoini gisepon dos dakgipa manderangni kosako chargesheet ka·na man·naba donga,” ine Syiem parakataha.
SP-ni parakatani gitade, matnanga man·gipa manderang baksa uamangni scooty donbagipa Mawlakhiat parking lot-oni a·bachenge police-rang, Raja aro Sonam-ni photo ka·na neng·takgipa biaprangkoba niangaha aro ia biapoba uamang Raja-ko so·otna jotton ka·ahachim indiba Raja an·tangni bike-ko chalaina a·bachengahani gimin uamang so·otna man·jae joljol re·angkuna nangaiaha. Uni ja·man police-rang, ia manderang baksa Wei Sawdong parking lot-ona re·angaha aro ua biapo uamang maikai scooty-rangko donaha, uarangkoba nipilangaha. Iani ja·man police-rang, viewpoint-ona re·ange, Raja-ni chadenggipa biapkoba ma·sie ra·na man·aha ine SP parakataha.
Ia biapo Raja-ko changgittam dake attechi den·aha ineba ua aganaha.
Police-rangni man·gipa sakkirangni giminde official-rang parakna nangnikkujaenga indiba ia case-ko bilakgipa ong·atanio, forensic mapping aro ia biaprangko nieanian mongsonggipa ong·gen ine aganaha.
Indore songjinmaoni bia ka·daldale re·bagipa Raja Raghuvanshi aro Sonam-ni gimaangaoni salchetni ja·man June 2 tariko Raja-ni sogimin manggisiko, Sohra jolo donggipa Wei Sawdong Falls sambaoniko man·ahachim. Raja-ni manggisiko man·ani ja·man Meghalaya Police, SIT-ko songe, ia a·selni bidingo sandirokna a·bachengaha aro ia mandeko so·otanina uni jikgipa Sonam, uni mikchagipa Raj Kushwaha aro uamangni so·otna tik ka·gipa mande sakgittamko rim·na man·aha.
Ia mande sakbongako rim·ani ja·man June-ni 11 tariko, Shillong-ni District & Sessions Court-o mikkangpaatenba, ia manderangko salchetna police-rangni jako kachari pakwate on·ataha.
