WILLIAMNAGAR: East Garo Hills a·jani District Transport Officer (DTO) John Bugner M Marak-ko gipin biapona kam apjitatani ja·man Garo Students Union (GSU) Eastern Zone (EZ) Williamnagar-ni salgnina office picketing ka·na tik ka·aniko dontongatpilaha.
East Garo Hills-ni DTO, kamtangchi re·na gisik nangja aro kam nangana re·angpagipa manderangko kragija dake aganronga ine matnangenba, dingtang biapona apjitatchina dabie, June-ni 19 aro 20 tarikrango salgnina DTO office-ko kam ka·na on·gija jingjengatna GSU-EZ Williamnagar tik ka·ahachim.
Iana skangba, East Garo Hills-ni DTO-ko dingtang biapona kam apjitatchina dabie, poster campaign aro office picketing-ko GSU ong·atangahachim.
Indake ong·engon, ia officer-ko dingtang biapona apjitatna gita ge·etaniko on·manaha ine GSU-EZ-ni dilgiparang parakatenba, uamangni salgnina office picketing ka·na tik ka·aniko dontongatpilaha.
“Chingni dabianiko chu·sokatahani gimin chinga chingni office picketing ka·e jingjengatangkuna tik ka·aniko dontongatpilna tik ka·aha. Ia dabianio ching baksa bakrimaniko on·ahani gimin chinga AIGU, FAF, AAYF, AHAM, Mother’s Union, Williamnagar Auto Taxi Association, aro Williamnagar Sumo-Pickup Association baksana chingni jingjengatanirango bak ra·pagipa chatro chatrirang aro chadambeskarangkoba mittelpilenga,” ine GSU-EZ Williamnagar-ni president parakatenba, ian sorkari office-rango dangdike on·enggipa manderangna, kamtango gisik nange aro manderangna bamani gnang kamrangko ka·na gita gisik ra·atani ong·china ine u·iataha.
