TURA: India a·song gimikchin chang 11-gipa ‘International Yoga Day’-ko maniengon, Garo Hills-ni dingtang dingtang bakrangoba ia salko maniangaha. Indake, South Garo Hills a·jani Border Security Force (BSF), 200 Battalion Sipai dol-ni Commandant, Vinod Yadav-ni dilanganichi International Yoga Day-ni bak ong·e, yoga session-ko Baghmara-ni Simsang Sports and Cultural Mission (SSCM) Indoor Stadium-o ong·ataha.
Ia manianio, BSF-ni sipai dolrang, Meghalaya Police, a·dok aro ma·mong sorkarini department-oni official-rang, dingtang dingtang dolni dilgiparang baksana Baghmara, Rangku Memorial Skul-ni chatro chatrirang, gimik sak 150-na bate manderang ia manianio bak ra·angpaaha. A·gilsak gimikchin ia dal·begipa manianiko pangna bilsian June-ni 21 tariko manironganiko dakenga, ian Prime Minister Narendra Modi-ni didianichi United Nations-ni a·bachengate on·gipa ong·a.
Indake ia manianganio, Yoga-ko ranta ka·anichi be·en aro gisik-ni an·seng baljokaniko rakkianio gisiko nange bak ra·anggipa songsalni manderangna aro BSF sipai dolrangna namgipa janggi tanganiko ja·rikanina namgipa cholba ong·aha. Apsandake West Garo Hills ajao, Tura-ni College of Community Science (CCS), Central Agricultural University (CAU)-oba chang 11-gipa Internatinal Yoga Day-ko manianio, College-ni skigparang, chatro chatrirang aro chadamberang, ‘an·seng baljokanina ku·cholsan ong·ani’ ingipa katta bichongo pangchake bilsiko nigrikgija apsan jinma ia manianio bakko ra·angaha.
Una agreba, ia manianio, Shraddha Karki Chetry-chi dilanganichi yoga session-ko ong·atange, gisik nangani aro tom·tomaniko bilakbatatna gita be·enni, gisikni aro rang·sitani nangrimgrike ranta ka·ani yoga-ko skie ra·angaha.
College-ni Dean, Dr. Jyoti V. Vastrad, jinmana aganprakangengon, be·enni aro gisikni tom·tomanina salanti janggi tanganio yoga-ni nangchongmotgipa ong·ani gimin mongsongbate dingtang dingtang susaani gadangrango ong·enggipa chadamberangna nangchongmotgipa ong·ani giminba aganangaha aro salanti janggi tanganio be·en aro gisikni an·seng baljokanina yoga-ko ranta ka·china sakantikon didiangaha.
Apsandake, Department of Human Development and Family Studies-ni ning·o chalaienggipa, Laboratory Nursery School-ni chonchongipa bi·sarangba International Yoga Day-ni bak ong·e skigiparangni dilanichi altugipa be·enni ranta ka·anirangko dakangaha. Indake CCS-ni Dean, Dr. Jyoti V. Vastrad ianoba bak ong·pae, dambekuenggipa bi·sarangni dal·rorobaenganio ian dakgipa namgipa ranta ka·anirangko dakdilanggipa dolrangko mittelpilangaha.
Una agreba, Selsella C&RD Block-ni ning·o ong·gipa Sobribari songoba ia salko maniani bak ong·e, skulni chatro chatrirang, chadamberang, me·apa me·chikmarang aro bilsi re·anggiparang budepa butchuma jinma apsan ia program-o bakko ra·e be·en aro gisikni an·seng baljoke rakkkianina yoga-ko ranta ka·angan baksana songsalni manderangna didianikoba on·angjolaha.
