MGMP Award-rangko on·a
SHILLONG: Re·anggipa Sonibar attamo, World Music Day-ko Shillong songjinmani Lariti Main Auditorium-o ong·atanio, Meghalaya Grassroots Music Project (MGMP) Season 3-ko Chief Minister’s Grassroots Music Program (CMGMP) ine mingsreenba a·bachengataha aro ia program-ko a·bachengatanio, MGMP-o nambatgipa a·dok gimikni dokgipa dam·gipa aro git ring·giparangna award-rangkoba on·angaha.
MGMP award-rangko chegipa Khasi Hills, Jaintia Hills aro Garo Hills-ni dolrang aro manderang, jekai Bending Waves, Magnificent Obsession, Strange Origin, Neil Umwi, Vanessa Suchiang, Snam Rangsa aro gipinrangna ia program-o dingtangmancha boksisrangko on·e mande ra·pilskaanikoba dakangaha.
Ia program-ko ong·atanio a·dokni Chief Minister Conrad K Sangma, jinmana aganprakengon, an·tangni pantemiting salrango doka dam·anirango chagrongna nanganirangko gisik ra·atpilenba, ua an·tangan iandakgipa neng·nikanirangko chagrongna nangahani giminsa da·alo sorkari, doka dam·ani aro git ring·anio gisik nanggipa chadamberang, neng·nikanirangko chagrongna nangjana gita iandakgipa cholrangko on·enga ine parakataha.
Chief Minister-ni aganani gitade, MGMP-ko a·bachengani somoio kror 3.5 tangkarangkosan koros ka·aiahachim aro sak 2500-mangni gita chadamberangsan bakko ra·aiachim indiba da·alo gong kror 69 tangkarangchi, sak 5400 git ring·gipa aro dokgipa dam·giparangna a·doko chang 38,000 program-rangko ong·atna man·engaha.
MGMP-ko da·ode Chief Minister’s Grassroots Music Program (CMGMP) ine mingenba, bilsiantian sorkarini program dake ong·atanggnok ineba Chief Minister parakataha.
CMGMP-ko a·dokni mingsinggipa biaprang jekai, Shillong-ni Ward’s Lake aro Tura-ni mongsonggipa biaprango ong·atanggnok aro ia program-ni bak gita doka dam·ani aro git ring·anirangko skie on·anirangba donggnok ineba ua aganaha.
Ia program-ko ong·atanio CMGMP Rock & Tourism Festival Booklet aro Council Technology Booklet-koba Chief Minister-ni jakchi oprake on·angjolaha.
