SHILLONG: Assam a·dokni dingtang dingtang biaprango niamgri songdongenggiparangko Assam sorkarini a·rikgalani ja·mano Meghalaya a·dokona napsrukbaaniko champengsona gita ru·uta bilsirangna Meghalaya a·doko donggipa manderangni nangnike dabienggipa Inner Line Permit (ILP) ko ra·gate on·china Voice of the People’s Party (VVP) MP Ricky Syngkon Sukrobaro Union Home Minister Amit Shah ko gronge didiangaha. New Delhi-o Home Minister Amit Shah ko gronge agangrikengon, Meghalaya a·doko niamgri songdongiparang aro napsrukbaanirang batrorobaenga mongsongbate Bangladesh aro Assam ni sima arirango batrikrikenga uni gimin uamangni gipin biapchini napsrukbaaniko sandie champengsona man·a gita ta·raken ILP ko ra·gatna nangengaha. Jedake Arunachal Pradesh, Mizoram, Nagaland aro Manipur a·dokrangode ILP ko ra·gatmanean ILP o pangchake a·dok gipini skatang napna man·ja uandake uamang a·doktangko aro a·doktangni manderangko chelchakaniko daka ine aganangenba, Assam sorkarini a·rikgalgipa manderang Meghalaya-ona napae mongsongbate sima arirango songdongna kenchaksoani donga ine mikrakataha.
ILP ko dabianiara ian gital ong·ja ine aganangenba, batanggimin December 2019 bilsio Meghalaya Legislative Assembly-o apsan ku·monge ILP ko ra·gatna resolution-ko pass ka·manahachim. Indake ong·genchimoba ian Ministry of Home Affairs-o da·onan matchotsrangkuja ine Syngkon aganangaha. ILP san ong·aigija re·a doani giminba janapangengon, Shillong-Dimapur, Shillong-Agartala aro Shillong-Silchar rangona songrena gita neng·nika. Unigimin tourism-ko balakbatatna aro badingchiwalaniko namdapatna Indian Institute of Tourism and Travel Management (IITTM) Shillong Campus-ko namdapate full-fledge dakchina Shillong-chi MP Ricky Syngkon Union Home Minister Amit Shah ko mol·molangaha.
