TURA: South Garo Hills a·jao donggipa rong·kolrangni bidingo NOMADS Film-ni dakchakanichi Gregory Allya Warjri-ni tarigipa ‘A·chik Kol’ minggipa documentary film ba jawilwat, Brazil a·songni Belo Horizonte-o ong·atanggipa chang 19-gipa International Congress of Speleology-o skanggipa biapko Professional Category-o chee, Meghalaya a·dokna aro mongsongbate Garo Hills-na mikkim rasongko ra·baaha.
Ia chang 19-gipa International Congress of Speleology-o Brazil, Australia, Lebanon, Argentina, Hungary, France, Spain, Slovenia, Czech Republic aro Switzerland gita dakgipa a·songrangoni ming 17 professional aro ming 16 amateur cave documentary film-rang bak ra·aha.
Ia ‘A·chik Kol’ documentary film-ko 2024 bilsini Core Geo Caving Expedition-o Garo Hills-o tariaha aro ia jawilwato a·gilsak gimikni a·ning bite sandigiparang, scientist-rang aro songo noko a·ning napgiparangni giminba tariaha. Ia Core Geo Exepedition-ni somoion, South Garo Hills a·jani Tolegre songo, gitcham matburingni dongspakoba rong·koloniko man·ahachim.
Ia jawilwatko 2014 bilsini September jao ong·atanggipa Hidden Earth UK Caving Conference aro 2024 bilsini November jao Switzerland a·songo ong·atanggipa Le Festival des Voyageurs d’Ici-oba mesokaha.
Ia jawilwatko bakan Shillong-oba chatro chatrirangna aro jinmana mesokna sienga ine u·iataha.
Ia international award-ko chena man·ahani gimin NOMADS Film-ni dilgiparang, Core Geo Expedition-ni founder-rang, chong·motan Thomas Arbenz aro Ayush Singh-ko mittelpilangan baksana ia jawilwatko Brazil-o mesokahani gimin Jean Marc Jutzet aro Roman Hapka-ko mittelpilangaha.
Una agreba uamang, Iainangsan Warjri, Lovingstar Khongkai, Derric Lyndem, Dalariti Nongpiur, Benji Syiem, Sunny Dohling, Core Geo Expedition-ni membor-rang, District Administration, Nokmarang, A·chik Cavers Exploration Society, Tolegre aro Nokatgre songni manderang, TMPRO Recordings aro Meghalaya Age-koba mittelpilangaha.
