SHILLONG: Khasi Hills Autonomous District Council (KHADC)-ni toll gate-rangko kuliani bidingo jera ra·grikanirangko nikna man·engon, ia toll gate-rangko niam gita ong·aia ine Voice of the People’s Party (VPP)-chi chalaienggipa Executive Committee-ni aganahani gimin United Democratic Party (UDP), raken jegalatskaaha.
Iandake KHADC-o EC-ko chalaienggipa VPP-ni a·kanganiko jegalatengon, National Highway (NH) ramarango kuligipa toll gate-rangara maikai niam gita ong·aha, iani bidingo jinmana talatskachina KHADC-o Opposition dolko dilenggipa UDP-ni dilgipa Titosstarwell Chyne dabiangaha.
“Adita salrangna skang ong·atanggipa KHADC-ni session-o executive membor in-charge an·tangan, ia toll gate-rango niam gita ong·aia ine aganaha. Ia toll gate-rangara maikai niam gita ong·a da·o uamang jinmana talatskachina,” ine Chyne dabiangaha.
NH ramarango toll gate-rangko kulianio ma·sisretgrikanirangko chel·atna gita a·dok sorkari aro KHADC-ni gisepo tom·e agangrikchina gita adita salrangna skangsan VPP-ni dilgiparang, ku·pattianiko on·angahachim.
A·dok sorkarioniko permission ra·chenggija kuligipa KHADC-ni toll gate-ko chipchina gita Ri Bhoi a·jani District Administration, ge·etaniko on·angahachim. Indake ong·genchimoba, ia toll gate-ko Constitution-ni Sixth Schedule-o on·gimin bilo pangchake, Trade department-ni ning·osa kuliaha ine KHADC aganchakaniko on·skaaha.
KHADC-ni ning·o donggipa NH ramarango kuligipa toll gate-rangara niam gita ong·aia ine VPP-chi chalaienggipa EC-ni a·kangahani gimin KHADC-ni Opposition dolko dilenggipa Chyne jegalatskaenba, iani bidingo jinmana talataniko on·china dabiangskaaha.
