SHILLONG: Garo Hills Autonomous District Council (GHADC)-o kam ka·enggipa manderangna ja 43-ni dormaharangko on·na man·kujaengani gimin iani bidingo GHADC-ni membor-rang apsan chanchirimna man·na gita a·dokni Bharatiya Janata Party (BJP), special session-ko ong·atna a·dokni Governor CH Vijayashankar-ko didina tik ka·angaha.
Iani bidingo kobor ra·timgiparangna u·iatengon, adita salrangna skang ong·atanggipa GHADC-ni chang 14-gipa session-oba GHADC-ni Executive Committee, district council-o kam ka·enggiparangna dormaharangko on·ani bidingo chanchirimna jechakahani gimin GHADC-ni special session-ko ong·ate, iani bidingo chanchirimskana nangenga ine Tura-ni MDC aro BJP-ni state vice president Bernard N Marak parakataha.
GHADC-ni session-o Opposition MDC-rangni chanchirimna ra·bagipa motion-ko ra·chakjahani gimin an·tangni suk ong·gijaniko parakatengon, GHADC-o kam ka·enggiparangna ja 43-ni dormaharangko on·na man·jaenganiara namen kragijani ong·enga indiba GHADC-ni session-ko iani bidingo chanchirimgija matchotataiaha ine Marak parakataha.
Marak-ni parakatani gitade, GHADC-o kam ka·enggiparang, indita jarangni dormaharangko man·tokkujaengani a·selan, nokdangtangtangko chalaianio, dedrangko poraiatanio, an·seng baljokaniko on·anio aro dingtang dingtang kamrango neng·nikanirangko chagrongna nangtokengachimm.
“GHADC-o kam ka·enggiparangni janggi tanganio namen dukniko chagrongna nangtokenga indiba GHADC-ko chalaienggipa Executive Committee, jrip dongnasa cholko ra·skaenga,” ine Tura-ni MDC, Robibar salo parakataha.
“District council-ni revenue-ko bariatani cholrangko anga baditaba chang Executive Membor-rangna ku·pattianirangko on·ahachim indiba ia cholrangko ruling MDC-rang knachakna gisik nangjaha. Da·o EC-ko chalaienggipa MDC-rangni a·selan GHADC-o iandakgipa obostako chagrongna nangenga,” ine Marak parakataha.
GHADC-ni man·enggipa tangka paisarangko dongnuna jotton ka·a dipetde iandakgipa obostarangkon chagrongna nangkuaigen ineba ua parakataha.
GHADC-o kam ka·enggipa manderangni man·na nangkuenggipa dormaharangni giminsan ong·aigija, GHADC-ni man·soenggipa tangka paisarangko nipiltaina aro koros ka·anirangko name nipilna gita special session-ko ong·atna nangchongmotenga ineba Tura MDC parakataha.
