SHILLONG: Assam a·doko niam gri songdong a·chaenggipa manderangko Assam sorkarini a·rikgalengani gimin a·rikgalako man·gipa manderang, Meghalaya a·doko katnapna kenchakanirangko paraktokengon, gipin biaprangoni niam gri napsrukanirangko champengsona gita a·doko chu·onga gitan niamrang donga ine a·dokni Cabinet Minister Kyrmen Shylla aganskaaha.
Shylla-ni aganani gitade, a·doko Tribal-rangko chel·chakna gita dingtangmancha Land Transfer Act aro Constitution-ni Sixth Schedule-ba dongani gimin ia niamrangchin gipin biaprangoni niam gri napsrukbae songdongna jotton ka·enggipa manderangko champengna man·aiachim.
“Niam gri napsrukbaenggipa manderangko champengna an·chingo Land Transfer Act aro Sixth Schedule dongani gimin gipin biaprangoni re·baenggipa manderang, mongsongbate gipin jatrang, nangchongmotgipa lekka gride a·doko songdongna man·jawa. An·chingni a·dok namen chel·chakako man·gipa a·dok ong·a,” ine ua aganaha.
Indake ong·genchimoba, a·dokna Inner Line Permit (ILP) aro Meghalaya Residents Safety & Security Act (MRSSA) gita dakgipa niamrangko nangkuenga ine janapatskaengon, da·o dongsoenggipa niamrangba a·dokko chel·chakna chu·onga ine Shylla parakataha.
“Gipin biaprangoni napsrukbaenggipa manderang songdongkamna skangan da·o mikrake donganikode nangenga indiba an·chingo Land Transfer Act gita dakgipa niamrang dongani gimin an·ching agre kenna nangjawa,” ine ua aganaha.
East Jaintia Hills aro Assam a·dokni simarango chel·chakanirangko bariatani gimin sing·anina aganchakaniko on·angengon, uni constituency-osan ong·aigija a·dok gimikni simarangon bilakbate nirok sandianikode nangenga ine Cabinet Minister parakataha.
“Manderangni bakrimanichi sorkari kamrangko ka·na man·genchimode darangba an·chingko sinjetna man·jawa,” ine Shylla aganaha.
A·dokni me·chikrangko bia ka·e re·baosa iandakgipa kamrangko ka·anio neng·nikanirangko chagrongna nangbata ineba ua aganaha.
“Meghalaya a·doko Tribal-rang, me·chikchipaksa re·batani gimin gipin jatrang an·chingni me·chikrangko bia ka·osa an·ching neng·nikanirangkode man·batronga. Indiba an·ching ku·cholsan ong·e kamko ka·genchimode aro uamangna cholrangko on·jagenchimode an·ching an·tangtangkon chel·chakna man·aigen,” ine Shylla aganaha.
