SHILLONG: Meghalaya a·dokni damgittam Autonomous District Council (ADC)-rangkon skatang koros ka·jachina aro korosrangko komiatchina, a·dok sorkari ge·etaniko on·angaha.
Garo Hills Autonomous District Council (GHADC)-o kam ka·enggipa manderangna ja 42 batpile dormaharangko on·na man·kujaengani gimin district council-rangko skatang tangka paisarangko koros ka·jachina a·dokni District Council Affairs (DCA) Minister Prestone Tynsong aganaha.
GHADC-o kam ka·enggiparangna dormaharangko on·na man·jaengani gimin a·dok sorkaride mamingkoba aganpana man·jawa indiba district council-rangko skatang tangka paisarangko koros ka·jachinasa aganna man·aigen ineba Tynsong aganaha.
DCA Minister-ni aganani gitade, district council-rangara jakgitelgipa bimangrangsa ong·ani gimin an·tangtangan kajinarangko bikotna man·na nanga aro kajina man·ani krisa kam ka·giparangkoba rakkina nanga.
GHADC-o tangka paisani gita neng·nikanirangko chagrongna nangengani gimin sorkari dakchakanirangko on·genma ine sing·anina aganchakaniko on·angengon, obostarangko nichengesa sorkari jekoba dakna man·aigen ine Tynsong parakataha.