AMPATI: Batanggimin somoirango, South West Garo Hills a·jani dingtang dingtang biaprango sorkari aro manderangni gam-jinrangko cha·uanio jak donggipa manderangko sandienba police-rang, adita sak cha·ugiparangko rim·na man·aha.
South West Garo Hills a·jani SP Vikash Verma-ni u·iatani gitade, cha·ugipa manderangni bidingo koborrangko man·soani ja·man SWGH a·jani police-rang, re·anggipa August-ni 29 tariko, Assam Police-rangni dakchakanichi, Mankachar jolrangoniko sandina a·bachengataha. Ia jolrangoniko am·sandion police-rang, Assam aro Meghalaya a·dokni simao donggipa Thakuranbari songni bilsi 43 ong·gipa Iftakul Islam-ko rim·na man·aha. Ia mandeni nokoniko police-rang am·sandienba, cha·ugimin battery-rang, copper wire-rang, sil ratani ostro aro gipin bosturangko man·aha. Ia bosturangko cha·uani bidingo Ampati police station-o mokordoma ka·ahachim.
Ia mandeni cha·ugimin bosturangko salna jakkalgipa pik-up gari bolsakoba police-rang sekaha.
Ia mandeni bidingo am·sandion, ia mandeara, Garo Hills aro Assam-ni Mankachar jolrango ma·manti bosturangko cha·ugipa dolni membor saksa ong·a ine ma·sina man·aha.
Indake ong·engon, September-ni 1 tarikoba South West Garo Hills a·jani police-rang, bilsi 23 ong·gipa Amirul Islam aro bilsi 26 ong·gipa Shahidul Islam-koba Thakuranbari-oniko rim·na man·aha aro cha·ugimin bosturangni bidingo sing·sandianirangko dakengkua ine SP parakataha.
Ia dolni gipin membor-rangkoba rim·na gita police-rang, sandianirangko dakengkua ineba ua u·iataha.