TURA: West Garo Hills a·jani Selsella Block Resource Centre (BRC)-o Block Resource Person (BRP)-ni kamna rakkigipa mande sakgniko salsnini gisepon ra·galpilchina dabie, Selsella-o dingtang dingtang dolrangni nangrime bikotgipa All Selsella NGOs Alliance (ASNA), West Garo Hills Samagra Shiksha Abhiyan (SSA)-ni District Mission Coordinator-na sedoataha.
Iani bidingo West Garo Hills a·jani District Mission Coordinator (DMC)-ba badi ka·e sedoatengon, Selsella BRC-o BRP-ni kamna seoka man·gipa manderangara, Selsella jolo songdongenggipa manderangba ong·ja aro ST gadangoniba ong·jani gimin jolo songdongenggipa manderangni nangnikani gita ong·jaenga ine ASNA parakataha.
“Selsella jolon lekka pora donggipa aro kamni gimin u·i-ma·sigipa chadamberang bang·en donga aro ia kamrangko man·na kraa. Joltangni ong·gijagipa aro ST category-ni ong·gijagipa candidate-rangko Selsella BRC-o BRP-ni kamna seokaniara joltangni manderangkon nichanggalani gita ong·enga,” ine ASNA-ni chairman HN Sangma parakataha.
Selsella-o BRP-ni kamna ra·gipa candidate sakgniko ra·galpilenba, gital dake candidate-rangko seokpiltaichina West Garo Hills a·jani DMC-ko didiatengon, Selsella-o atchikame songdongkamgipa aro A·chik candidate-rangna skanggipa cholrangko on·chengchina ASNA dabiangaha.
Ia dabianiko salsnini gisepo chu·sokatjagenchimode NGO-rang, a·songni on·gimin bilo pangchake jingjengatanggen aro iana DMC-ni office-an daiko ra·na nanggen ineba ASNA mikrakataniko on·angaha.
Ia ASNA-o Selsella-ni GSU, FKJGP, ASWA, GSMC, ADE, ANYO, NGCO aro uandakgipa dolrang bakrimtokengachim ine nikna man·a.