SHILLONG: Re·baenggipa 2027 bilsio, chang 39-gipa National Games-ko Meghalaya a·doko sokachakna gita kamrangko nanga gitan ka·samsoengaha ine a·dokni Sports Minister Shakliar Warjri parakataha.
Badiaba badiaba kamrango namdapatna nanganirang dongkuenga ine janapatengon, ia kal·susaaniko sokachakna gita nangani kri kamrangko ka·soengaha ine Warjri aganaha.
Adita salrangna skang, salgro salaram a·dokrango donggipa sports minister-rangni tom·aniko ong·atani bidingo janapatengon, National Games-ko sokachakanio, kamrangko sualgrike ka·na ia tom·anio tik ka·angaha ine Warjri parakataha.
“Ia tom·aniko ong·atani miksonganiara, National Games-o dingtang dingtang kal·susaanirangko a·dok ge·antinan sualgrike on·na aro ia kal·susaaniko sokachakanio kamrangko sualgrike on·anian ong·a,” ine ua aganaha.
Kal·susaanirangko a·dokrangna sualani bidingo da·osa chanchikuengmiting ong·ani gimin da·o dipet kamrang matchotsrangkujaenga aro jensalo a·dok ge·antinan kal·susaanirangko sualmanaha, unosa iani bidingo talbate u·iatna man·gen ineba Sports Minister aganaha.
National Games-ko sokachakna gita Meghalaya a·doko tarisamsoanirangko janapatengon, a·ja ge·antinan a·dok sorkari tangka paisarangko watatmanahani gimin, dingtang dingtang kal·susaanirangna trial-rangko ong·atna gita ia tangka paisarangko jakkalna sorkari, sports association-rangna bilko on·manaha ine Warjri aganaha.
Ia chang 39-gipa National Games-ko Meghalaya a·dokba name chu·sokatna man·gen ine an·tangni ka·dongchaksoenganiko parakatengon, “Ia National Games-ko sokachakna Meghalaya a·dok tarisamsoengaha aro 2027 bilsi sokahaon ia kal·susaaniko sokachakna kamrang matchotsognok,” ine Sports Minister aganaha.
Meghalaya a·dokni manderang, gipin biaprangoni re·bagipa manderangko sokachakanio jaksramgiparang ong·ani gimin ia National Games-oba dingtang dingtang a·dokrangoni re·baenggipa manderangko aro official-rangko name sokachakna man·gen ineba Warjri aganaha.