SHILLONG: Adhoc skulrango skigiparangna dormaha bariatchina dabianiko a·dok sorkari knachakjaengani gimin Federation of All School Teachers of Meghalaya (FASTOM), jingjengatna tik ka·angaha.
Re·baenggipa September-ni 13 tariko Tura-o tom·aniko ong·atangenba, adhoc skulrango skigiparang, sorkarini kosako jingjengatna chanchirimanggen ine FASTOM-ni vice president S Jungai parakataha.
Jungai-ni parakatani gitade, adhoc skulrango skigiparangna dormaha bariatchina dabianiko knachakjaengani gimin skigiparang, Shillong aro Tura-o jingjengatanirangko dakanggen.
Adhoc skulrango skigiparang, bang·gija dormaharangkosan man·paengani a·sel neng·nikanirangko chagrongna nangtokenga ine janapatengon, adhoc skulrango skigiparangna dormaha bariate, dingtang dingtang man·gnirangkoba on·china, adhoc skulrangko deficit gadangona ra·dochina, bilsio 5 percent ka·e dormahako bariatchina aro kamoni neng·takani bilsiko bilsi 60-oni bilsi 65-ona bariatchina gita skigiparang dabiengachim ine FASTOM-ni vice president aganaha.
Skigiparangni dabianirangko gisik ra·attaina gita 2023 bilsini March 17 tarikon a·dokni Education Minister Rakkam A Sangma-na memorandum-ko on·taiahachim ineba ua aganaha.
Jungai-ni parakatani gitade, lower primary aro Hindi skigiparang japrako gong 18,000 ka·e dormaha man·engon, upper primary-o skigiparang gong 22,000, secondary gadango skigiparang gong 29,000, higher secondary gadango skigiparang gong 33,000 aro science skigiparang gong 31,000 ka·e man·skaengachim.
Ia skigiparang, hajalni hajal chatro chatrirangna lekka porako on·engoba, dormaharangko chu·onga gita man·pajaengani a·selan dedrangnade namgipa lekka porako on·na man·tokjaenga ineba FASTOM-ni vice president parakataha.
Meghalaya State Education Commission-ni report-na chu·ongnikgijaniko parakatskaengon, “2023 bilsini July jao songgipa Commission, adhoc skigiparangni neng·nikanirangko namatgen ine chinga ka·dongengachim indiba sorkarina on·gipa final report-o adhoc skigiparangni dormahako bariatani giminde maming ku·pattianirangko on·jaha,” ine Jungai aganaha.
Uamang association-ni gita a·dokni Chief Minister, Deputy Chief Minister, Education Minister aro Education department-ni official-rangna changni chang memorandum-rangko on·ahaoba da·alonan skigiparangni dabianirangko chu·sokatkujaenga ine janapatskaengon, iani giminsa skigiparang, sorkarini kosako jingjengatna tik ka·angaha ine FASTOM-ni vice president parakataha.