SHILLONG: Maming niam gri garirango glass gisim chate salgipa ba siren gam·ate salgipa ba uandake sorkarini dongimin niamrangko pe·gipa manderangni kosako rakgipa ja·kurangko de·gen ine sorkari mikrakataniko on·angaha.
Adita salrangna skang, Shillong songjinmani Secretariat sambao, an·tangtangko sipai dolni manderang gita dakjegipa manderangko, silchidarerang baksa rim·ani ja·man iandake bil jakkalsretgipa manderangna sorkari mikrakataniko on·angaha.
Iani bidingo kobor ra·timgiparangna talataniko on·angengon, “Je manderangan, niam gri garirango glass gisimko chate jakkalenga ba sirenrangko gam·ate salenga ba uandake niamko pe·gipa manderangni kosako rakbatsranggipa ja·kurangko de·china chinga police-rangna ge·etaniko on·manaha,” ine Mongolbar salo, a·dokni Deputy Chief Minister aro Home (Police) Minister Prestone Tynsong aganaha.
Matnangako man·gipa manderangoni saksade election-o susanaba gnang ine agananikoba ua raken jegalataha.
“Iandakgipa koborrangko na·simang banoniko man·a angade ma·sija. Ia mandeko ma·siama ine anga ka·rimska mitam dilgiparangkoba sing·aha indiba darangba ia mandeko ma·sija inesa agantokaia. Uni gimin iandake skatang aganaiako bebera·na nangja. Angni aganna miksonganide, na·a bilo ong·enggipa manderang baksa nangrimgipa ong·naba gnang indiba iandake niamko pe·nade darangba man·jawa,” ine Tynsong aganaha.
An·tangko dal·gipa mande ine dakjegipa mande saksako Sukrobar salo Shillong-ni police-rang, silchidare ra·bitgipa manderang baksa rim·na man·ahachim. Ia mandeoniko register ka·kugijagipa Audi A4, ML-05AF 0309 Scorpio gari aro T0922b ML7411A Toyota Innova gari baksana adita silchidarerangkoba police-rang man·aha.
Rim·a man·gipa mandeara, Shillong Pohkseh-oni Mebanshem Snaitang minggipa mande ong·achim.