SHILLONG: September-ni 5 tariko kamoni neng·takanggipa Meghalaya High Court-ni Chief Justice, Justice Indra Prasanna Mukerji-ni biapko ra·rikna gita Calcutta High Court-ni Justice Soumen Sen-ko Supreme Court-ni collegium biming mingataha.
Bristibar salo, Supreme Court-ni Chief Justice BR Gavai, Justice Surya Kant aro Vikram Nath-ni collegiums, tom·e chanchirimangenba, Calcutta High Court-ni Justice Soumen Sen-ko Meghalaya High Court-ni Chief Justice-na biming mingna tik ka·angaha.
Meghalaya High Court-ni Chief Justice-na biming mingako man·enggipa Justice Sen, 1965 bilsini July 27 tariko Kolkata songjinmao atchiaha aro ua St Lawrence High School-o poraiani ja·man 1990 bilsio LLB porikkako Calcutta University-o pass ka·aha. Justice Sen-ko 1991 bilsio, West Bengal-ni Bar Council ning·o saksa ukil dake biming segataha.
Biming segatako man·ani ja·man Justice Sen, bilsi 20-na kingking Calcutta High Court-o ukil ong·e kamko ka·aha aro 2011 bilsio Judge-ona ra·doatako man·aha.