SHILLONG: West Garo Hills Jengjal-o donggipa Baljek Airport-ko be·en pil·atchipjani gimin Dadenggre MLA Rupa Marak suk ong·gijaniko parakaha, je biapkon musical concert-rangko ong·ataninasa mingsingpil·skaengachim.
Koborni manderangna aganengon, Airport-ni kamrangko ka·na gita A·dok Sorkari ia bilsi a·bachengon AAI baksa MoU soi ka·manaha ine aganachim, indiba da·alona kingking mingsa kamkoba Airpot-o ka·a dongkuja. A·dok Sorkarini a·kange aganani gitade, mikkang bilsi April jaonide ia Airport-ko chalaiani ong·engjokchim ine Marak aganaha.
Ia airport-o ru·uta bilsirangna skangon nokdonggae on·jokchim indiba da·alona kingkingba ia airport-ko manderangna jakkalna ba songre-songbatani cholko on·na man·kujaenga ine Dadenggre MLA suk ong·gijaniko parakaha.
Baljek airport-ko ru·uta bilsirangna nirokgija galchipani gimin Sorkarini kosako matnange aganengon, ia airport-ko be·en pil·atchina gita dingtang dingtang NGO-rang aro manderang changni chang A·dok Sorkariko didigenchimoba, a·dok sorkari dal·e ra·jaha ineba Rupa Marak aganaha.
