SHILLONG: Meghalaya a·doko me·chikrangko bilsi sokgija bia ka·ataniko aro me·chik bi·sarangni kosako ong·gija dakanirangko champengna gita a·dokni Social Welfare department, Standard Operating Procedure (SOP) ba niamrangko tarie sorkarina on·angaha.
Mongolbar salo, dingtang dingtang dolrang baksa tom·e chanchirimani ja·man kobor ra·timgiparangna talataniko on·angengon, a·doko bilsi sokkugijagipa me·chikrangko bia ka·atani aro me·chik bi·sarangni kosako ong·gija dakanirang batroroengani gimin iandakgipa kamrangko champenganio kamrangko nipiltaina aro niamrangko nangani kri ong·atna gita department, SOP-ko on·manaha ine Social Welfare department-ni Advisor Paul Lyngdoh parakataha.
“Chinga department-ni tarigipa SOP-ko on·manaha aro ian da·o a·dokni advocate general-ni ra·chakaniko sengengkua. Ia niamrangko a·dokni Advocate General ra·chakahaon, manderangna u·iatna gita chapa ka·gen aro Meghalaya High Court-naba on·anggen. High Court-o iandakgipa case-rang bang·en dongkuengani gimin chinga department-ni SOP-ko High Court-na on·anggen,” ine Lyngdoh aganaha.
Songadam nokadamrango manderangna agan-talate on·anirang komiengani gimin Protection of Children from Sexual Offences (POCSO) gita dakgipa niamrangko ja·rikatanio chagrongna nangenggipa neng·nikanirangkoba Lyngdoh janapangaha.
“POCSO gita dakgipa niamrangko songadam nokadamrango ma·sibretokja aro Meghalaya a·dokode bi·sarangko bia ka·atrongjani gimin ia niamko ja·rikaniara namen neng·beani kam ong·a. An·chingode bi·sarangko bia ka·atrongja indiba a·dokni bang·bata biaprangon bilsi sokkugijagipa me·chikrangko bia ka·atengani a·sel bilsi 13-14-ni gisepon bi·sa man·gipa me·chikrangba donga. Ia niamko ja·rikenba dos donggipa manderangko rim·na nangoba songni dilgiparangan, ia niamko chengonin ja·rikbaenga ine aganode ian namen rakbegipa kam ong·a. Uni giminsa iani bidingo songni nokni manderangna mikrakatanirangko on·chengna nangenga,” ine Social Welfare department-ni Advisor aganaha.
Ia niamrangni bidingo counsellor-rang, u·i-ma·sigipa manderang aro CDPO-rang, diltugipa songrangona re·ange agan-talatanirangko on·gen ineba Lyngdoh parakataha.
Iandakgipa niamrangko ra·gatanio, sipai dolrangko dakchakna gita songni Village Defence Party (VDP) gita dakgipa dolrangko bilakbatatna nangengani giminba Lyngdoh aganaha.
