SHILLONG: Meghalaya a·dokni deficit skulrango skigiparang, dingtang dingtang neng·nikanirangko chagrongna nangengani gimin Budbar salo, Khasi Jaintia Deficit School Teachers’ Association (KJDSTA) aro Garo Hills Deficit School Teachers’ Association (GHDSTA)-ni dilgiparang, a·dokni Education Minister Lahkmen Rymbui-ko grongenba, an·tangtangni neng·nikanirangko niatchina mol·molangaha.
KJDSTA aro GHDSTA-ni dilgiparang, dingtangmancha memorandum-koba Education Minister-na on·angaha aro ia memorandum-o skigiparang, skigiparangna gadang sualani, deficit skulrango skigiparangna DA-rangko gamjaengani, Central Provident Fund (CPF) scheme aro MAXIMS online portal-ni gimin janapataha.
Education Minister-na memorandum-ko on·angani ja·man, kobor ra·timgipa manderang baksa agangrikengon, skigiparangna gadang sualani bidingo a·dok sorkarini parakataniara skigiparangna jajaaniko ra·baaha indiba da·o dipet deficit skigiparangkode iano man·chapjaenga ine Education Minister ku·rachakaniko on·ahani gimin chinga ka·dongatanikode man·aha ine KJDSTA-ni president Boswell S Pala parakataha.
Skigiparangna gadang sualaniko December 31 tariko parakna gita ka·dongenga aro iako re·baenggipa bilsini April jaonide ja·riknaba dongaha indiba ian da·o dipet deficit skulrango skigiparangnade nangchakeani dongkujawa ine Pala aganaha.
Deficit skulrango skigiparangna DA-ko on·ani bidingo janapatskaengon, gipin kam ka·giparangnade sorkari, 46%, 49% aro 51%-ona kingking bariatahaoba deficit skigiparangde DA-ko da·onan 43 percent on·engkua ine Pala parakataha.
“Ian skigiparangko nichanggala gita ong·enga ine chinga bebera·a aro chingni DA-koba bariatchina chinga a·dokni Education Minister-ko didiangaha,” ine KJDSTA-ni president aganaha.
Pala-ni aganani gitade, skigiparangni DA-ni bidingo ua November-ni 14 tariko Commissioner aro sorkari official-rang baksa chanchirimgen ine Education Minister, ku·rachakaniko on·ataha.
CPF scheme-ni gimin janapatskaengon, 2010 bilsini April 1 tarikna skang kamo rakkia man·gipa skigiparangde, an·tangtangni tangka paisarangko Laitumkhrah Branch-ni account ge·sanon chipdime donengani gimin name ma·sitokjaenga ine Pala parakataha.
“Mitam skigiparangde be·enni gita an·senggijaniko man·ani gimin kamtangtangko watna nangaha aro mitamde kamtangtangoni neng·takangaha indiba an·tangtangni CPF-ko okna man·tokjaenga,” ine Pala aganaha. Iani bidingo Education Minister, Trustees Board baksa tom·e chanchirimna ku·rachakaniko on·ataha ineba KJDSTA-ni president parakataha.
