AMPATI: India a·songni skanggipa Home Minister Sardar Vallabhbhai Patel-ni chang 150-gipa atchiani salko maniani bak gita Sukrobar pringo, South West Garo Hills a·jani Ampati-oba, Ek Bharat-Aatmanirbhar Bharat Unity March-ko ong·atangaha aro ia Unity March ba re·jomanio, chatro chatrirang, sorkari official-rang aro jolo songdongenggipa manderangba bak ra·angtokaha.
Jinma re·jomaniko, South West Garo Hills a·jani Deputy Commissioner Hema Nayak, Superintendent of Police Vikash Varma aro District Administration-ni official-rang dilangaha aro ia re·jomaniko, DC Office Complex-oni a·bachengate, Ampati Students Field-o matchotataha.
Jinma re·jomaniko a·bachengna skang, kan·dikgipa program-ko DC Office Complex-o ong·atangaha aro ia program-o Sardar Vallabhbhai Patel-na mande ra·pilskaanirangko dakangan baksana Ampati Degree College-ni chatro chatrirang, dingtang dingtang dakmesokanirangkoba ong·ataha.
Ia program-ko ong·atanio, South West Garo Hills a·jani Deputy Commissioner, jinmana aganprakangengon, ia re·jomaniko ong·ataniara, Children’s Day baksa apsan salon ong·ahani gimin ia manianiko orto gnangbatataha ine an·tangni kusi ong·aniko parakataha.
Sardar Patel-na mande ra·pilskaaniko on·angengon, uni on·gilanirangchi India a·songni jakgitelko man·na skang aro jakgitelko man·ani ja·manba namroro silrorona dakchakaha ine Nayak aganaha.
Deputy Commissioner-ni aganprakani ja·man dingtangmancha Aatmanirbhar Bharat Pledge aro Nasha Mukt Bharat Pledge-ko SWGH a·jani Assistant Commissioner MK Wankhar dilangskaaha.
Ia Unity March-ko mikkango donge dilgipa manderangoni mitamrangara, South West Garo Hills a·jani ADC DBG Momin, ADC WCR Marak, Resubelpara My-Bharat Kendra-ni Deputy Director Linda BK Sangma, District Sports Officer SM Marak aro gipinrang ong·a.
