AMPATI: Garo Hills-o bang·a skul nokrangkon taridapna nangengon, South West Garo Hills a·jao Ghilajhuri Government Aided UP skul nokba obosta namsrangjahani a·sel poraienggipa chatro chatrirang aro skigiparang neng·nikanirangko chagrongna nangtokengani gimin ia skul nokkoba taridapna nangenga ine kobor on·aha.
Kobor on·ani gitade, ia skulko 1986 bilsio kulichengaha aro da·o ia skulo sak 38 chatro chatrirangna, UP skulrangna dongimin niamo pangchake, skigipa sakbri skie on·enga.
Ia skul nokko, 2023 bilsio mikka balwa ta·rakangani somoio nosto ka·angaha aro da·onan ia skul nokko taripile on·a dongkujaengani a·sel, nokking selprupruaosa class-rangko ra·na nangenga ine u·iataha.
Koborko on·ani gitade, ia skulara Mahendranganj constituency-ni ning·o ga·akgipa skul ong·a.
“Ia skul nokko 2023 bilsio mikka balwa nosto ka·aha aro untalan nokking grisa, class-rangko ra·na nangenga. Mikka waani somoirangode chinga class-ko ra·na man·jae, chutti watna nangrongaia. Indake ong·genchimoba chinga skulo poraienggipa bi·sarangna a·gilsakni seng·aniko on·na jotton ka·enga,” ine skulni headmaster Nidhiram Hajong parakataha.
Headmaster-ni u·iatani gitade, ia skul nokko rikpiltaina gita dakchakaniko on·china uamang, SWGH a·jani Deputy Commissioner, Education department aro disaster management-naba lekkarangko sedoahachim indiba da·o dipet maming dakchakanirangko man·kujaenga.
“Skul nokko taripile on·na gita tangka paisarang dongjani a·sel uamang mamingkoba dakna man·jaenga inesa chingna aganaha. Ia skulara government aided skulsa ong·ani giminba chinga maming dakchakanirangko man·jaenga,” ine Hajong aganaha.
Ia skulna dakchakaniko on·china gita uamang joltangni MLA-koba didiahachim indiba da·alona kingkingan maming dakchakanirangko man·kujaenga ineba skulni skigiparang parakataha.
Ia skulo gimik kuturi ge·bri donga aro ia pilak kuturirangan da·o obosta namsrangjaha. Ia skulni kuturi ge·sakode skigiparangna common room dake jakkalenga aro ge·gittamode chatro chatrirangna class-rangko ra·enga.
“Ia skul nokni do·ga kelkirangba namsrangjaha aro altuaen kulina man·aiaha. Iani a·selan chinga skulni gamchatgipa bosturangko skulo donna kenengaha,” ine skulni headmaster aganaha.
Ia skulara, Bangladesh a·songni simao ong·ani gimin kenchakna nanganirang batenga ineba skigiparang parakataha.
Indake ong·engon, ia skul nokko rikpiltaina man·na gita dakchakanirangko on·china skulni skigiparang, a·dok sorkariko mol·molataha.
