SHILLONG: 2024 bilsio dal·dalgipa concert-rangko Meghalaya a·doko ong·atanichi gong kror 133-mangni gita tangka paisarangko a·dokna man·dapaha aro iandakgipa program-rangko ong·atachi a·doko dingtang dingtang bading chiwalanirangko dake cha·enggipa manderang namgniko man·aha ine Sukrobar salo, a·dokni Chief Minister Conrad K Sangma aganaha.
Shillong songjinmani Ward’s Lake-o ong·atenggipa Shillong Literary Festival-ni gnigipa salo bak ra·engmiting somoio ia kattarangko Chief Minister aganaha.
Chief Minister-ni aganani gitade, a·doko dingtang dingtang program-rangko ong·atna tangka paisarangko koros ka·e a·dok sorkari, bang·en tangka paisarangko man·dapskaenga aro ian a·dokni Gross State Domestic Product (GSDP)-ko baridapatna dakchakani ong·enga.
Shillong songjinmao niksenggipa Ward’s Lake-ko nitobatate taridapna gita skanggipa gong kror 20 aro ja·mano gong kror 30-ko chamdape gimik gong kror 50 tangkarangko chamataha ineba Chief Minister parakataha.
Shillong Literary Festival-ko ong·atanichi a·dokni tourism-kosan ong·aigija economy-koba tang·doatna man·enga ine janapatengon, ia Literary Festival-ko ong·atanichi, a·doko sena jotna gisiko nanggipa manderang, an·tangtangni changa sapaniko mesokna gita cholko man·engaha ine Chief Minister parakataha.
Ia Literary Festival-ko chonbegipa tom·bimongaoni da·o dal·begipa maniani ong·atna man·aha ine janapatengon, a·doko sena jotna gisik nanggipa manderang, an·tangtangni golporangko manderangna u·iatna sikgenchimoba skango iandakgipa cholrangko man·pajachim indiba da·alo ia Literary Festival-ko ong·atanichi sena jotna gisiko nanggipa manderang, namgipa cholko man·engaha ine Chief Minister aganaha.
A·dokni chadamberangko, sea jotanio gisik nangchina didina gita a·dok sorkari, sea jotanio mingsinggipa manderangko aro ki·tap serakgipa manderangko gipin biaprangoniko a·dokona rimbaenga ineba Chief Minister parakataha.
