TURA: India a·songni jakgitelanina dakgrikdilgipa aro India-ni skanggipa Deputy Prime Minister aro Home Minister ong·chenggipa Sardar Vallabhbhai Patel ni chang 150-gipa atchianiko gisik ra·na ba mande ra·pilskaani gita Unity March-ko India a·songni dingtang dingtang bakrangon manienga gitan District Sports Office, West Garo Hills aro District Administration Tura songjinmaoba Sonibar pringo Ek Bharat Aatmanirbhar Bharat (Unity March)-ko ong·atangaha.
Unity March-ko a·dokni PHE Minister Marcuise N Marak mongsonggipa sokgipa ong·e Flag Off ka·e a·bachengate on·angaha. Gipin mongsonggipa bak ra·giparangara, West Garo Hills, Deputy Commissioner, Vibhor Aggarwal, DIG (Western Range) Jerry Fisher K Marak, Superintendent of Police, Abraham T Sangma, Tura-ni MDC Bernard N Marak una agreba ADC-rang sorkari officer-rang School-ni skigipa Principal, BSF, NCC aro chatro chatrirang sak 400-na baten bak ra·angtokaha. Indake ia Unity March-ko Hawakhana William Point-oni pring 7 bajioni a·bachenge Te·tengkol Te·teng a·ja, Jerusalem aro Member Hostel, Babupara gita re·bae DC Park-o matchoteaha.
Minister Marcuise N. Marak, tom·anio jinmana aganprakataon Unity March-ko ‘historic event’ ba itihaso gisik ra·kamnagipa tom·dakani ine janapaha. Indake chadamberangko Sardar Valabhbhai Patel-ni namgipa skianirangko ja·rikchina didiaha. Sardar Patel gitan an·chingni Prime Minister Narendra Modi, India-ko biltango pangchakgipa ong·atna re·mikkangenga ine aganaha.
DC Aggarwal-ba jinmana aganprakataon, Sardar Patel-ni India-na dangdike on·angarangko aganange manderangko joltango tarigipa ba man·gipa bosturangko jakkalchina didiangaha. Indake joltangni entrepreneurship-ko ra·dona gita didiangaon district-o tarigipa LED bulb-ko de·mittelaha.
