Chadamberang bang·batani gimin drugs badinggiparang M’laya-ko nisan ka·bata: Shylla
SHILLONG: National Games aro Asian Games-o bak ra·e a·songtangna aro a·dokna medal chegiparangnade, Meghalaya Outstanding Sportsperson Direct Policy (MOSDAP)-ni ning·o sorkarini kamrangko on·gen ine Sonibar salo, a·dokni Sports & Youth Affairs Minister Wailadmiki Shylla parakataha.
Mawprem-o futsal turf aro state-of-the-art basketball court-ko kulie on·angani ja·man jinmana aganprakatengon, kal·susaanirangchiba a·dok sorkari, chadamberangna janggi tangani cholrangko on·na cholrangko nienga ine Shylla aganaha.
Iandakgipa kamrangna dakchakaniko on·na gita department-ni budget-ko gong kror 400-na baten bariataha ine janapatengon, Shillong-o bakan football stadium-ko rikgnok ine Sports Minister parakataha.
Meghalaya a·doko songdongenggiparangoni bang·batan chadamberangsa ong·ani gimin drugs badinggipa manderang, Meghalaya a·dokko nisan ka·batenga ineba Shylla aganaha.
Shylla-ni parakatani gitade, Meghalaya a·doko songdongenggiparangoni 60 percent-de bilsi 35-na komigiparangsa ong·ani gimin ong·gija kamrangko ka·na gita chol ra·batronga.
Iana skang, jolni MLA aro a·dokni gitcham minister Paul Lyngdoh-ba jinmana aganprakangengon, iandakgipa kal·chakanirangko tarie on·anichi, a·doko changgipa sapgipa manderangko ong·katatna aro constituency-na mikkim rasongko ra·bana dakchakgen ine parakataha.
Meghalaya a·dokni chadamberangna a·dok sorkari, nambatsranggipa cholrangkosa on·na jotton ka·enga ineba Lyngdoh aganaha.
Ia tom·anio a·dokni gitcham Sports Minister Shakliar Warjri-ba jinmana aganprakengon, kal·susaanirango bak ra·anichi chadamberango namgipa gun aro bewalrangko ong·atna man·a ine aganaha.
