SHILLONG: Kamna galani bilsiko SSA teacher-rang changni chang dabienggipana sorkari ama dipet dakna amako parakangaha aro ia gadango je dakgipa gital ka·donganiko on·angn man·jawaha ine Education Minister Lahkmen Rymbui Bristibar salo rongtalen parakangaha.
Iani bidingo ru·uta bilsirangna name dake chanchiangaha aro teacher-rangko kamo rakkikam dongimin sal tarikrang baksa service-ko apsangrik ong·e dona chanchiako ra·chakaha ine ua aganaha.
Sorkarini gita mejamangmang ja·ku de·gipana uamangni kusi ong·aniko SSA teacher-rang uko gronge aganangaha, aro kam ka·ani gital bilsiko tarichinaba mol·molangaha ine Rymbui talatangaha. 2022 bilsio Personel, Education aro Law Department-rang-ni gita bilsi 45-ona SSA teacher-rangna kamna galani bilsiko sorkari bariataha aro skang nakatgipa criteri-o ga·akgijagiparangna jemangan mejamangmang uamangni kamrangko gimataha uamangna changsanao on·gopna on·aha.
Gimikni gitan chanchie niaha, da·o gipin ka·dongataniko on·angna man·jawaha, ine Minister aganaha. Teacher-rangni gita gnigipa neng·nikani, skulrangko namdapatchina sing·angaha, sorkari kam ka·aniko matchotatna on·kangaha indiba dakna nanggnirang apalani gimin re·baenggipa academic session-na skang matchotatna man·jawa ine Rymbui aganaha. December 31-o dormaha on·a aro kamko naljokatna department skang done chanchianggen, ine ua aganaha.
Bonggipa season re·baenggipa aro a·dok re·baenggipa bilsina state budget-ko tarisoengaha, tik ong·e chanchigipako chu·sokatna department somoi nangdapkuenga, ine Rymbui agandapangaha.
Education Minister Lahkmen Rymbui baksa chanchirimani ja·man Meghalaya SSA Schools Association (MSSASA) president Aristotle C. Rymbai, talatangaha, ranta ka·aniko senggnang matchotatchina delegate mol·molangaha jedakode re·baenggipa bilsini academic-o skulrangko name dake chalaiangna man·gen.
2025 bilsini October 29 tariko Cabinet chanchirimani somoio SSA skulrangko dongkamatna sorkari ra·chakangenganina association baksa agangrikaniko a·bachengataha ine Rymbui aganaha. A·dok gimiko ja·ku de·enganina Chief Minister Conrad K Sangma, Education Minister aro Education department-ko association de·mittelangaha ine ua aganaha.
SSA teacher-rangna kamna galani bilsiko watchina delegate naataha. Sorkari LP aro UP skulrangna bilsi 37-oni 45-ona 2024 bilsini December 11-o office memorandum nakatanichi kamna galangna bilsiko sorkari ra·dodapatmanaha ine Rymbui mesoke aganangaha. Jemangan bilsi bade man·gipa teacher-rangna changsa dake bilsiko on·angchina association da·o sing·angaha, jedakode uamangba bangbang ong·enggipabiaprangna galna man·gen. Iani bidingo ua nipilgen aro ku·rachakngna skang Personel aro Law department-rangni manderang baksa agangrikchengna nanggen ine minister uamangna aganaha ine ua agandapangaha.
