Chief Minister, kror 130 scholarship-ko on·a
Shillong: Chief Minister, Conrad K Sangma, Sonibar salo Tura District Auditoriium-o ong·atgipa programo academic year 2024-2025-na Umbrella Post Matric Sholarship-ko parakataha. Tom·anio Education Minister Lakhmen Rumbui, Education-ni Commissioner & Secretary Vijay Kumar Mantri, West Garo Hills-ni Deputy Commissioner, Vibhor Aggarwal aro Higher & Technical Education-ni Director Hazel D B Sangma-uamangba bakko ra·angaha.
Tom·anio jinmana parakatangaon Chief Minister, Conrad K Sangma, indine aganaha, “Sorkari, Umbrella Post Matric Scholarship-ni gnigipa instalment-ko wataha, sak 70,000 chatro-chatrirangna kror 130 tangkako watenba sorkarini student-rangna scholarship-ko on·na ku·chakako chu·sokataha, ma·mong sorkarini tangka watako senggija sorkarini gita man·anirangko on·chengaha. Da·odipet ma·mong sorkarioniko tangkako man·soa dongkuja, ma·mongoni ru·utani a·selsa scholarship-ko on·anio somoi nangaha. Student-rangni chagronggipa neng·nikarangko u·ie scholarship-ko on·na tik ka·aha.”
“Uandake student-rangko scholarship-ko ra·chakna gita bank account-rangko Aadhaar baksa link ka·china ba nangdimatna aganaha.
Sorkari, education sector-ko skang done kamrangko ka·enga, ta·raken Ad Hoc aro SSA teacher-rangni dabianikoba nirokanggen ine CM parakangaha.
Iarangni gisepon programo bang·en chadamberang bakko ra·gen ine nikenba iandakgipa cholko nie Chief Minister, chadamberangna sorkarini a·bachengatgipa dingtang dingtang programrang jekai- CM Elevate, YESS Meghalaya, Prime, MGMP, STAR program, Hello Meghalaya, unbaksana kal·susani a·barango a·bachengatgipa programrangni gimin chadamberangna talate on·angaha.
Chadamberangan a·dokko tang·doatanio mongsonggiparang ong·a, uni gimin jekai education bilongen gamchata ugitan chadamberangna cholrangko on·naniba apsan daken gamchata. Meghalaya, a·dokni tang·doani namroro-silroroaniara chadamberangni jako ong·a ineba CM aganaha.
Iarangni gisepon Education Minister Lakhmen Rymbui, student-rangna scholarship-ko parakataniko sorkarini poraienggipa student-rangna dakchakna ku·chakaniko chu·sokatgipa sal ine aganaha, mikkangchiba education -ni a·bako namdapatna kamrangko ka·angkuna aganaha.
Programo a·dokni dingtang dingtang bakrangoni sak 7000 student-rang online gita bakko ra·angaha. Unbaksana heads of institutions, teacher, students, education department-ni officer-rang bakko ra·angaha.
