SHILLONG: Meghalaya a·doko Cabinet-ko gital dake sualpiltaiaoni da·o jagni batpilengahaoba United Democratic Party (UDP)-ni ning·o ‘gisik sagrikanirangko’ namatna man·kujaenga aro uandaken party-ni mitam dilgiparang, da·o 2028 bilsini Assembly election-na skang, dingtang miksonganirang dongenga ine koborko man·soaha.
UDP-oni mitam kobor on·timgiparangni u·iatani gitade, ia gisik sagrikaniara, UDP-ni saksa dilgipa Paul Lyngdoh-ko Cabinet-oniko ra·galani ja·man ong·aha maina uko ra·galaniara uni kamrangni gimin ong·ja indiba party-ko dilenggipa manderangni didiani giminsa ong·aha.
UDP-ko dilenggipa manderangni iandakgipa kamna Lyngdoh, suk ong·nikjae, re·baenggipa 2028 bilsini Assembly election-o National People’s Party (NPP)-ni tikitchi susaskana chanchianirang dongenga ineba kobor on·timgiparang parakataha.
Iani bidingo Lyngdoh, an·tangde da·o dipet mamingkoba parakna gita jechakskakuenga.
UDP-ni gisepo Cabinet-ni biaprangko sualgrike ra·na songgigrikanirang dongachim ine party-ni mitam dilgiparang aganengon, Cabinet-ni biapko sualgrike ra·na gita ku·sikchi ba seachi maming songgigrikanirang dongja aro ian party-ko dilenggipa manderangni nangnikanisan ong·aia ine Lyngdoh aganskaaha.
Cabinet-ko gital dake sualpiltaiani ja·man September-ni 16 tariko gital minister-rangni ku·mikchetanio Lyngdoh bak ra·ejaha aro ian uni suk ong·nikgijaniko mesokaniba ong·aha.
NPP-chi dilenggipa Meghalaya Democratic Alliance (MDA)-II Cabinet-oniko ra·galani giminde gisik saja indiba ian mandeni chanchiani bewalosa pangchakaia ine adita salrangna skangsan, a·dokni gitcham Cabinet Minister aro UDP-ni MLA Paul Lyngdoh aganahachim.
Iani bidingo talataniko on·angengon, MDA-II Cabinet-ko sualpilna salbri skangsan UDP-ni foundation day-ko maniaha aro party-ni president an·tangan, Cabinet-ko sualpiltaina chanchia dongja ine media-na aganahani gimin ian maikai politics-o chanchianiko ja·rika, unosa pangchakaia ine Lyngdoh aganaha.
Lyngdoh-ni parakatani gitade, Cabinet-ko sualpiltaina jasa skangba party-ni dilgiparang, Cabinet-ko sualpiltaiani gimin sing·dotokaha maina ua somoio Cabinet-ko sualpilani ong·engahachim.
CEC-ni tom·aniko dilgipa party-ni president an·tangan Cabinet-ko sualpiltaina miksonganirang dongja ine aganahachim ineba UDP MLA parakataha.
“Uan anga mai gadangko jako ra·enga, uni giminde ong·ja indiba party-ni president-sa, Cabinet-ko sualpiltaina miksonganirang dongja inede aganaha,” ine Lyngdoh parakataha.
Indake ong·engon, Cabinet-oniko ra·gala man·gipa UDP-ni sakgipin MLA Kyrmen Shylla-de party-ni ja·ku de·aniko ra·chakaha aro party-ni nangnika gitan kamko ka·na parakskaaha.
