SHILLONG: Umbrella Post Matric Scholarship-ni gnigipa instalment-ko a·dok sorkari, Sonibar salo, a·dokni chatro chatrirangna watatani ja·man, scholarship-ni tangka paisarangko Scheduled Tribe (ST) chatro chatrirangna chu·gimikkon on·china gita BJP-ni state vice president aro Tura-ni MDC Bernard N Marak, a·dokni Chief Minister Conrad K Sangma-ko didiataha.
Marak-ni parakatani gitade, Umbrella Post Matric Scholarship-ni tangkarangko Krismasna skangan chatro chatrirangna chu·gimik on·na nangenga aro scholarship-ni tangkarangko chu·gimik on·jagenchimode ian ST chatro chatrirangni kosako ong·gija dakani gita ong·gen.
Garo Hills-ni bang·a chatro chatrirangan scholarship-ni tangkarangko chu·gimik man·jaha ine matnangatengon, ian scholarship-ni chu·gimik tangka paisarangko on·na gita Chief Minister-ni gisik nanggijaniko mesokani ong·a ine Marak parakataha.
Maini a·sel Meghalaya a·dokni chatro chatrirang, baditaba chang dakesa scholarship-ni tangkarangko man·aha aro maini a·sel ia bilsio chatro chatrirangna on·gipa tangkarang, re·anggipa bilsi baksa apsan ong·jaha, iani bidingo talatchina gita ua Tribal Affairs Ministry-na chittiko sedoataha ineba Tura-ni MDC parakataha.
Chatro chatrirang, Aadhar baksa link ka·gimin bank account-rang donggenchimoba, re·anggipa bilsiode Direct Benefit Transfer (DBT)-ko ja·rikjaha ineba Marak parakataha.
Chatro chatrirangni man·na nanggipa chu·gimik scholarship-ko a·dok sorkari talate on·na nanga ine dabiangengon, iani bidingo talataniko on·na man·jagenchimode ian ST chatro chatrirangni kosako ong·gija dakani gita ong·gen ine BJP-ni state vice president parakataha.
