Feb 2 tarikni gisepon inquiry report-ko on·china ge·eta
MENDIPATHAR: North Garo Hills a·jani Mendipathar College-ko chalaianio ong·gija dakanirangna matnanganirangko man·ani ja·man college-ni principal aro vice principal-ni kosako sandirokanirangko dakchina gita Meghalaya Lokayukta, police-rangna ge·etaniko on·angaha.
Mendipathar College-ni Principal Mothis M Sangma aro SK Chaudhary-ni kosako Charansing Marak minggipa mande badi ka·doangani ja·man, sandirokanirangko dakchina Meghalaya Lokayukta ge·etaniko on·angaha.
Mendipathar College-o Governing Body (GB) dongkujamiting somoio gong lak 39-na batpile tangka paisarangko koros ka·na on·ahani gimin aro apsan somoion college-ni account-ko joint account-chi chalaigija saksani account-chisa chalaiahani gimin college-ni principal aro vice principal-ni kosako Lokayukta-na badi ka·doangaha.
College-ni principal-koba GB dongkujamiting somoiosa songahani gimin Charansing, sing·doataha.
Indake ong·engon, Mendipathar College-ni principal aro vice principal-ni kosako, Meghalaya sorkarini Under Secretary-ni gadangna komigijagipa police officer-chi sandirokna gita Meghalaya Lokayukta, a·dokni Director General of Police (DGP)-na ge·etaniko on·ataha.
Inquiry report-ko re·baenggipa 2026 bilsini February 2 tarikni gisepon sokatchina gitaba Meghalaya Lokayukta ge·etaniko on·aha.
