TURA: Garo Hills Autonomous District Council (GHADC)-o kam ka·enggipa manderangna jaantian jani skanggipa tariko dormaharangko on·na man·na gita dormaha on·ani cholrangko namdapatna man·aha ine West Garo Hills a·jani Deputy Commissioner Vibhor Aggarwal parakataha.
Iani bidingo kobor ra·timgiparangna talataniko on·angengon, GHADC-o dormaharangko on·anio dingtang dingtang neng·nikanirangko re·anggipa October jao sorkarini dakchakaniko on·ani ja·man namatna gita man·aha ine Aggarwal aganaha.
Deputy Commissioner-ni aganani gitade, GHADC-o kam ka·enggipa mitam manderang, bank account nombor-rangko aro IFSC code-rangko ong·gija seani a·sel dormaharangko somoi gita on·na man·rongjachim indiba da·ode ia pilakkon namatna gita man·aha. Iarangni bidingo ja·mano GHADC-ni Secretary, nangani kri talatanirangko on·angkuchina ineba ua aganaha.
Dormaha on·ani kamrangko da·o gital dake a·bachengna man·ahani gimin November jani dormahakode watatenba bank-rango chipatmanaha aro GHADC-o kam ka·enggipa bang·bata manderangnan dormaharang napaha ineba Deputy Commissioner parakataha. Sorkarini dakchake on·gipa gong kror 7-mangni gita tangka paisarangchi GHADC-o kam ka·enggipa sak 1300-mangni gita manderang, November jani dormahako man·aha ineba ua aganaha.
GHADC-o kam ka·enggipa officer-rang aro gipinrangni rakbee kamko ka·anichi da·ode dormaha on·anio ru·utaniko chel·atna man·aha ine janapatengon, dormaharangko on·anio parak ong·ani aro hisaprang dongna gita ia gital kamko bilsigittamni Escrow Account-chi ka·enga ineba Aggarwal parakataha.
Deputy Commissioner-ni aganani gitade, ia Escrow Account-ko bilsgittamna tarichengahaon, mikkangchide dormaharangko on·anio sorkario pangchakna nangjana gita GHADC-ko, tangka paisani gita chu·onggipa ong·atna sorkari nangnikenga.
Ia gital cholko ra·gate on·anichi, dormaharangko on·na dakchakahani gimin GHADC-o kam ka·enggipa manderangba a·dokni Chief Minister Conrad K Sangma-ko mittelpilataha.
