TURA: Sorkarini dingtang dingtang scheme aro project-rangko jako ra·e kam ka·aniko nina gita Niksamso Garo Community Organisation (NGCO), Garo Hills-ni dingtang dingtang biaprangona re·roroe, songni nokni manderang baksa agan-chanchirimenga ine u·iataha.
“Sorkarini scheme-rang, dingtang dingtang kamrangko chu·sokatani, matchotgija ba galchipe donenggipa kamrangko nina gita chinga Garo Hills-ni dingtang dingtang biaprangona wenaniko a·bachengataha,” ine NGCO parakataha.
NGCO-ni parakatani gitade, Garo Hills-ni dingtang dingtang songrangona re·anio organization-ni membor-rang, songni manderang baksa tom·e, sorkarini scheme-rangko maidake ka·enga, galchipe dongipa kamrang dongama dongja, sorkarini nokrangko jakkalgija galchipe donarang dongama dongja aro maikai kamrangko name ka·jani a·sel songni nokni namroro silroroanio nangchakeaniko man·enga, uarangni bidingo sing·sandie ra·enga.
“Garo Hills-o songdongenggipa manderangni namgnina miksonge ra·gatgipa scheme aro dingtang dingtang project-rangko chu·sokate on·anio, parak ong·ani, hisap dongani aro kamrangko name ka·china gita miksonganio chinga ia kamko ka·enga. Matchotgija dongenggipa kam mingantikon chinga see ra·enga aro ja·mano iarangko namdapatna gita nangchakegipa department-rangna report-ko on·gen,” ine NGCO-ni dilgiparang parakataha.
