Gital Assembly nokko rikani June jaon matchotgnok ine Speaker paraka

SHILLONG: New Shillong Township (NST)-ni Mawdiangdiang-o rikenggipa gital Meghalaya Legislative Assembly nokko matchotna ra·dodaptaiani dongjawaha aro ia gital Assembly nokko, re·baenggipa 2026 bilsini June jaon matchottelgnok ine Sombar salo, Assembly-ni Speaker Thomas A Sangma parakataha.
Assembly nok rikaniko nipilna gita Sombar salo tom·aniko ong·atani ja·man iako Sangma, kobor ra·timgiparangna parakataha.
Ia tom·anio Speaker baksana a·dokni Deputy Chief Minister Prestone Tynsong, Assembly-ni Commissioner & Secretary Andrew Simons, Finance, Parliamentary Affairs, PWD (Buildings), NIC Meghalaya aro Meghalaya Legislative Assembly Secretariat-ni official-rangba dongpae bak ra·angaha.
Assembly Speaker-ni parakatani gitade, jaantian Assembly nok rikaniko nipilrongengani a·sel da·o bewalan kamrang matchotangengaha.
“Ia tom·aniko ong·atani namen chu·sokgipa ong·aha ine parakna anga kusi ong·a. Iandake tom·anirangko ong·atjringenganichi chinga kamrangko name nirokna man·enga aro kamrangko matchotatna gita maiko dakna nangenga, pilakkon ma·sina man·enga,” ine Sangma aganaha.
Ia Assembly-ni main hall-ko re·baenggipa bilsini June jaon matchotna gita nisanko donsomanaha ine janapatengon, ia main hall-ko matchotahaode, Assembly-ni pilak session-rangkon ia gital building-o ong·atna man·gnok ine Speaker parakataha.
Gital Assembly nok rikaniko ua an·tangan December-ni 11 tariko niangtaigen ineba Sangma parakataha.
Ia gital Assembly nokko rikanio dingtang dingtang nangchongmotgipa gadangrang dongani gimin nokko rikanio namen simsakbena nangaha ine adita salrangna skangsan Speaker aganahachim.
Gital Assembly nokko matchotatanio ja·manchakahaoba korosrangnade maming nangchakeani dongjawa ineba Speaker talataniko on·angaha.
Ia gital Assembly nokni gnigipa bakna chu·gimik Detailed Project Report (DPR)-ko tariengaha ine janapatengon, ia gnigipa bako staff quarter-rang aro gipin nangchongmotgipa bakrangko man·chapenga aro iana nangchakegipa Central Ministry-rang ra·chakmanaha ine Speaker parakataha.