SHILLONG: National People’s Party (NPP)-chi dilenggipa Meghalaya Democratic Alliance (MDA) sorkari, kamtangna gisik on·gija da·onin re·baenggipa 2028 bilsini Assembly election-nasa gisik nanganiko mesokskaenga ine Voice of the People’s Party (VPP)-ni president aro Nongkrem MLA Ardent Miller Basaiawmoit matnangataha.
Meghalaya Assembly election-ko re·baenggipa 2028 bilsiosa ong·atna sienga ine janapatengon, MDA sorkarini dilgiparang, a·dokna namroro silroroaniko ra·baani pal, election-o vote-rangko salna gitasa da·onin an·tangtangni constituency-rangna kamrangko ka·soskaengaha ine Basaiawmoit aganaha.
A·dokni Chief Minister, jean an·tangni office-osa ong·na nangachim, da·onin 2028 bilsini Assembly election-nasa, dingtang dingtang constituency-rangona wene, party-tangni candidate-rangna campaign ka·soskaengaha ineba Basaiawmoit matnangataha.
“Bang·a somoirangon chinga party-ni gita chief minister-ko gronge chingni nanganirangko una u·iatna jotton ka·ronga indiba chinga una grongna man·rongjae, office-o asongenggipa gipin official-rangosa on·rongbana nangaia,” ine VPP president aganaha.
Ian a·dok sorkariko, VPP-na kena ine mesokani ong·a ineba Basaiawmoit aganaha.
“Ian manderang, NPP sorkariko be·atgnok ine mesokani ong·a aro uamang an·tangtangni asongenggipa biaprangko wate on·na nanggnok,” ine VPP president aganaha.
VPP-ko Kristianrangnasan mikkang nitegipa party ine NPP-ni dilgiparang, dingtang dingtang biapni manderangna dilsretaniko on·na jotton ka·enga ine janapatengon, VPP-de torom ba jat ge·sanasan kamko ka·gipa ong·ja indiba pilakni namgninan kamko ka·gipa party ong·a ine Basaiawmoit a·kangataha.
NPP sorkari kamo gisik nanggija 2028 election-nasa gisik on·batenga: VPP
Date:
Share post:
