WGH-ni Teksragre-Manggakgre jolrango namroro silroroani dongjaenga

TURA: West Garo Hills a·jani Teksragre-Manggakgre jolrango pilakni gitan namroro silroroani dongjaengani a·sel songni nokni manderang neng·nikanirangko chagrongna nangtokenga ine ia jolrango songdongenggipa manderang, a·dokni Chief Minister Conrad K Sangma-na badi ka·doatenba, ia jolrango namroro silroroaniko on·china didiataha.
Manggakgre Area Development Committee-ni Chief Minister-na sedoatanio parakatani gitade, West Garo Hills a·jani Jengjal aro Dadenggre Civil Sub-Division-ni ning·o donggipa songrang, jekai Teksragre, Silsekgre, Gindopara, Chinapgre, Dejinggro, Derikgre, Renchagre, Manggakgre, Nengchonggre aro Jengritgre songrango, rama jal·lang, bijoli, sanchakram aro namgipa ringani chirangko man·pajaengani a·selan neng·nikanirangko chagrongna nangtokenga.
“PA Sangma-ni ‘Life in Politics’ ingipa ki·tapo, ‘Bilsiantian an·ching maikobade man·na ka·dongronga indiba mamingkon man·parongja’ ine janapani gitan ia songrangoba apsan obostakon chagrongna nangtokenga. Ia songrango namgipa rama jal·langrang, bijolirang, sanna banani cholrang aro ringani chirangkoba man·pajae, songni nokni manderang, neng·nikanirangko chagrongna nangtokenga,” ine Manggakgre Area Development Committee-ni dilgiparang parakataha.
Ia songrango, health centre-rang dongjani a·selan saa ding·ani somoirangoba manderang, A·chik samrangkosa jakkalbatronga ine janapatengon, badiaba somoirango ia samrangko jakkale mande sina nanggenchimode, ojarangkosa sam kal·aka pote, songni manderang kragija kamrangko ka·ronga ine Manggakgre Area Development Committee-ni dilgiparang parakataha.
“Ian namen chanchina nanggipa kam ong·chongmotenga aro ia songrangna sanchakram biaprangko on·na nangenga,” ine committee-ni dilgiparang parakataha.
Ia chittiko Manggakgre Area Development Committee-ni dilgiparang, Meghalaya Assembly-ni Deputy Speaker aro Raksamgre MLA Limison D Sangma-ni jako Chief Minister-na on·ataha.