SHILLONG: Gipin a·dokrangoni Meghalaya a·dokona manderangko salbaenggipa tourist taxi-rangko champengsona niam dongja ine a·dokni Deputy Chief Minister aro Transport Minister Sniawbhalang Dhar, talataniko on·angaha.
Mongolbar salo, All Khasi Meghalaya Tourist Taxi Association (AKMTTA)-ni dilgiparang baksa tom·e chanchirimangani ja·man iako Dhar aganaha.
AKMTTA-ni dabienga gita gipin a·dokrangoni tourist taxi-rangko champengsona niam dongja ine talataniko on·angengon, gipin biaprangoni biap nina aro rona re·baenggipa manderang, a·dokni tourist taxi-rangko jakkalskachina gita a·dok sorkari, bakan dingtang dingtang hotel, resort nokgiparang aro tour operator-rang baksa tom·aniko ong·atenba didianggen ine Dhar parakataha.
“Chinga a·dokni tourist taxi association baksa name golpogrikna man·aha aro ian chu·sokgipaba ong·aha,” ine Dhar aganaha.
Gipin a·dokrangoni mande salbaenggipa tourist taxi-rangko champengsochina AKMMTA-ni dabienggipani gimin janapatengon, “Gipin a·dokrangoni re·baenggipa garirangko champengsona niam dongja aro iako uamang (AKMTTA) ma·siaha,” ine Transport Minister aganaha.
Iani bidingo maming ja·kurangko de·na skangba a·dok sorkari, Advocate General (AG)-ni agan-ku·pattianiko bi·ataha ineba Dhar parakataha.
Hotel chalaienggiparangko aro tour operator-rangko man·a dipet a·doktangni taxi-rangko jakkalskachina didina sorkari tik ka·angaha ineba ua aganaha.
Local taxi chalaienggiparang namgipa bewalrangko rakkina nangenga ine janapatskaengon, “An·tangtangni garirangko name aro rongtal an·tale rakkichina chinga local tourist taxi salgiparangko mol·molna ska. Meghalaya a·dokona re·baenggipa manderang, uamangni kamrango kusi ong·china gita driver-rangba namgipa gunrangko ja·rikna nanga,” ine Dhar aganaha.
