MTET pass ka·gimin candidate-rangko ta·rake kamo ra·china gisik ra·attaia

SHILLONG: A·dokni dingtang dingtang sorkari lower aro upper primary skulrango bangbang ong·e dongenggipa skigipani kamrangko ta·rake gapatchina gita a·doko Meghalaya Teacher Eligibility Test (MTET)-ko pass ka·e dongenggipa candidate-rang, a·dok sorkarina gisik ra·attaianiko on·angaha.
Iani bidingo Education department-ni Commissioner & Secretary Vijay Kumar-na sedoatengon, batanggimin bilsi gittamni gisepo skigiparangko kamo ra·ani dongkujani a·sel mitam skigiparangde, sorkarini kamna dongimin bilsi batangna sipilengaha ine 2023 aro 2025 bilsio MTET pass ka·gipa candidate-rang, suk ong·gijaniko parakataha.
Skulrango bangbang ong·e dongenggipa skigiparangni kamrangko gapatningjaengani a·selan MTET pass ka·e dongenggipa candidate-rang aro sorkari skulrango lekka porako on·anioba nangchakeaniko man·enga ineba MTET pass ka·gimin candidate-rang parakataha.
MTET pass ka·e dongenggipa candidate-rangko kamo ra·kujaskal, da·o changgipin MTET porikkako ong·atkujachina gitaba uamang dabiangaha.
MTET aro D.El.Ed/DIET pass ka·gimin candidate-rangkosa kamo ra·chengchina gita Education Department-ko didiatengon, primary skul ge·antion, skulo saksan kam ka·enggipa skigiparangni neng·nikanirangko namatna aro skulrango skie on·ani baksana skie ra·ani kamrangko namdapatna gita komibeoba skigipa sakgittam ba sakbri skigiparangko kamo ra·china candidate-rang didiataha.
MTET pass ka·e dongenggipa aro kam ka·sogimin mitam skigiparangde, kamna dongimin bilsina batna am·pilengaha ine janapatskaengon, mitam skigiparangde iandake ru·utengani a·selan bilsi batpilengaha ine MTET pass ka·gipa candidate-rang parakatenba, skigiparangna apsan cholko on·na gita dongimin bilsiko bariatskachina gita sorkariko didiataha.
Scheduled Tribe aro Scheduled Caste-rangna Upper age limit-ko bilsi 32-oni bilsi 40-ona bariatna gita 2024 bilsini December 11 tariko Education department-ni on·gipa Office Memorandum-ni giminba MTET pass ka·gipa candidate-rang janapataha.