SHILLONG: Re·baenggipa election-rango United Democratic Party (UDP), chegipa ong·na ka·dongenganiko parakatenba, sorkariko rikna gita chol on·china a·doko songdongenggipa manderangko didiataha.
Iani bidingo kobor ra·timgiparangna talataniko on·angengon, “Chinga an·tangtangko name tarisamsoenga aro mikkangchi dingtang dingtang ra·bianirangkoba chagrongna ka·dongenga. Anga bebera·a, mikkangchi ong·atna sienggipa election-rango UDP chu·sokgipa ong·telgen,” ine UDP-ni dilgipa aro Khliehriat-ni MLA Kyrmen Shylla aganaha.
Shylla-ni parakatani gitade, election-ni result-rangan UDP-ni kamrangko mesokaniba ong·gen.
“Election-ni result-rangan gimikko parakgen. Chinga da·o an·tangtangko tarisoengaha aro election-rango dakgrikna tariaha,” ineba ua aganaha.
Manderangni chakpaanirangko party-na nangchongmota ine janapatengon, “Bang·a changon manderang, UDP-ko name dakna ka·dongronga indiba name dakna gitade chinga chu·onga gita membor-rangko nangskaa ine chinga manderangko ma·sichakchina nangnikenga. Uni gimin chinga an·tangtangan kamrangko name ka·na man·na gita chingni membor-rangko seokchina chinga a·dokni manderangko mol·molenga. Unosa manderang, chingko matnangna man·gen aro chingaba uko ra·chakna man·gen,” ine UDP MLA aganaha.
Gipin dolrangna kenani nangani gimin janapatengon, “An·ching changsa politics-o napahaode an·ching an·tangtangan sakgipinrangna kenna nanganiba ong·aigen ba sakgipinrangchi ka·mikkenatakoba man·aigen. Pilak party-rangan an·tangtangni bewalrang donga aro an·ching iako nom·e ra·na nangja. Chingni daitode an·tangtangko tarisoanian ong·a aro an·tangtangko tarisamsoachian sakgipinrangna ka·mikkenataniba ong·skanaba gnang,” ine Shylla aganaha.
“Chinga ka·donga, da·al ong·jaoba knal ba salsaode manderang chingna sorkariko chalaina chol on·chongmotgen. Sorkariko chalaina UDP-na chol on·genchimode chinga an·tangtangni bil amaniko manderangna mesokna man·gen,” ine UDP MLA parakataha.
