TURA: Meghalaya a·doko jute ba me·ka ge·aniko tang·doatna aro game ge·e cha·enggipa manderangna janggi tangani cholko on·na gita Budbar salo dingtangmancha State Level Workshop-ko Tura-ni SMELC Hall-o ong·atangaha.
Ia program-ko a·dok sorkarini Agriculture Directorate, National Jute Board (NJB), Jute Corporation of India (JCI) aro ICAR-Central Research Institute for Jute & Allied Fibre (CRIJAF) nangrime ong·atangaha aro ia workshop-ko a·bachengatanio, West Garo Hills a·jani Additional Deputy Commissioner (ADC) Mary Lisa K Marak, Agriculture-ni Joint Director Tashri M Momin, District Agriculture Officer Paulette A Sangma, Agriculture (A&A)-ni Joint Director Ian Borne Saiborne, Jute Corporation of India-ni Manager (O&M) Partha Sarathi Rontray, Deputy Director (Agronomy) Monica Mawroh aro a·dokni dingtang dingtang biaprango game ge·e cha·enggipa manderangba bak ra·angtokaha.
Ia tom·bimonganio West Garo Hills a·jani ADC Mary Lisa K Marak, jinmana aganprakengon, dingtang dingtang gama ge·anirangchi pangkamgipa janggi tangani cholrangko on·na nangengani gimin aganangaha. Game ge·e man·gipa bosturangko bazaar antirango palna gita cholrangko on·na nangengani gimin janapangengon, ia workshop-o skie ra·anichi an·tangtangni gama ge·anirangko namdapatchina aro man·gnirangko bariatchina gita Marak, game ge·e cha·giparangko didiangaha.
