WIILIAMNAGAR: East Garo Hills a·jani, Williamnagar District Sports Association playground-o salgnina ong·atgipa Simsang festival-ko a·dokni Cabinet Minister Marcuise N Marak Bristibaro a·bachengate on·aha. Ia festival-ko pangna bilsian, dingtangmancha jatni daka-rikani bewalo manirongenga, jeon manderang uamangni changa-sapachi tarigimin bosturangko, game-ge·e man·gimin bolam-biterangko pala-botaniko dakenga.
Cabinet Minister Marcuise N. Marak programo bakko ra·giparangna aganengon, mikkangchi jatni dakbewalrangko ripingna aroba a·doko bading-chiwale cha·giparangna namgipa cholrangko ia festival-o on·enganina ua district administration-ko mittelaha. Indake a·dokni Skotong Minister Conrad K. Sangma-ni dilanichi, a·dokni economy-ko 10 billion-dollar-ona tang·doatna krengenganiko chu·sokatna re·mikkangenggipani bidingo aganengon, rama jal·lang, tourism aro una agreba a·dokni bading-chiwalgiparangko dakchakanian ia miksonganio mongsonggipa ong·gen ineba Marak aganaha.
Sorkarini iandakgipa namgipa miksonganiko chu·sokatna re·mikkanganio, mongsongbate Garo Hills-o namdapanirangko ra·bana kam ka·enga ine parakatengon, a·dokni dingtang dingtang a·barango gisiko nanggiparangko an·tangtangni changa sapanirangko tang·doatna iandakgipa festivalrango cholrangko ra·pachina gitaba ua didiaha.
Una agre, ia festival-o ia bilsio jaktangchi tarigimin rokomari bosturangko pala botanirangko dakna bang·a dokkanrangko kuliaha.
Festival-o mongsonggipa sokgipa Cabinet Minister Marcuise Marak baksana, State Planning Board-ni Chairman Nihim D. Shira aro East Garo Hills a·jani Deputy Commissioner RP Marak mangba program-o mongsonggipa ong·e bakko ra·angaha.
