SHILLONG: Meghalaya a·dokni sak 23,000 Adhoc aro SSA skigiparangni pay scale, annual increment aro uamangni kamko naljokatanina Education Department-ni de·e ra·bagimin ba proposal-ko a·dokni Cabinet-o ra·chakaha ine Chief Minister Conrad K Sangma Sukrobar salo parakataha.
Adhoc aro SSA skigiparangna uamangni seniority ba kam ka·ani bilsi ru·utani kri dormaharangko bariatna gita Education Department-ni de·e ra·bagiminko Cabinet-o ra·chakaha, unbaksana uamangni kamrangko kim·kimatna aro uamangni kamoni neng·takani somoio tangka-paisani gita neng·nikaoni naljokna gita Contributory Provident Fund (CPF)-koba ra·gatgen, jenan skigiparang aro sorkari dolgnian on·gilgen.
Ia bariatgimin dormaharangko 2026 bilsini April 1 tarik dipet on·anggen aro ian Krismasna skang skigiparangna namgipa kobor ong·aha ineba Chief Minister parakataha.
Skigiparang, Education Minister aro officialrangko uamangni krenge kam ka·anina mitelpilskaan baksa, ian Education sector-o dingtanganiko ra·bana dakchakgen ineba ua aganaha.
Indake ia ra·chakgiminko chu·sokatna gita mikkang jagittamni gisepon rake kamrangko ka·gen ine aganan baksa, ian ru·uta somoirangna SSA aro Adhoc skigiparangni dabibaenggipa ong·a aro MDA sorkarini jakchi ia dabianirangko chu·sokatna man·ahanina ua namen kusi ong·a ineba Chief Minister Conrad Sangma aganaha.
Adhoc aro SSA skigiparangna April jaoni gital dormahako on·gnok:CM
Date:
Share post:
