Ramao a·sel ong·ani batroroenga ine AIIMS Guwahati-ni Prez suk ong·gijaniko paraka
SHILLONG: India a·songo, mongsongbate salgro salaram jolrango gari a·sel ong·anirangchi mande sianirang batroroengani gimin, manderangna mikrakataniko on·na gita Sombar salo, dingtangmancha Road Safety Seminar-ko Shillong songjinmani North Eastern Indira Gandhi Regional Institute of Health & Medical Sciences (NEIGRIHMS)-o ong·atangaha aro ia seminar-ko ong·atanio, AIIMS Guwahati-ni President aro Guiness World Record-ko man·gipa Padma Shri Prof Dr BKS Sanjay, mongsonggipa sokgipa ong·e, jinmana agan-talatanirangko on·angaha.
Meghalaya a·dokko man·chape India a·song gimikon ramao a·sel ong·anirang batroroenga ine an·tangni suk ong·gijaniko parakatengon, ia a·selrangoni 90 percent-mangni gitade, manderangni simsakgijani a·selsa ong·a aro ia a·selrangko gelna man·achim ine Dr Sanjay parakataha.
“Simsakgija aro nangana bate ta·rakdugae garirangko salani a·selan, ramarango iandakgipa obostarangko chagrongna nangrongbata. Ian mandeni bewalsa ong·ani gimin iako an·ching mikrakatanichi, skie on·anichi aro gari gorarangko name salchina agane on·anichi chel·chakna man·gen,” ine ua aganaha.
Meghalaya a·doko gari gora a·sel ong·e siani, India a·song gimikni average-na batenga ineba Dr Sanjay mikrakataniko on·angaha.
Iandake gari gora a·sel ong·aniko champengna manderangko aro official-rangkoba mikrakchina didiangengon, “Traffic-ni niamrangko rakbate ja·rikanichi, garirangko simsakbate salanichi, gari gora salani niamrangko skie on·anichi, awareness program-rangko ong·atjringanichi aro ramarango rakgipa niamrangko ja·rikanichi, ia a·selrangko champengna man·gen,” ine Dr Sanjay aganaha.
Ia Seminar-ko ong·atanio, Orthopaedic Surgeon Dr Gaurav Sanjay-ba aganprakengon, helmet-rangko aro seat belt-rangko gananichiba janggirangko jokatna man·a ine manderangna mikrakataniko on·angaha.
