Bangsi A·pal songni Songkritano laksa batpile manderang bak ra·a
TURA: Re·anggipa December-ni 31 tarik walo Garo Hills-ni pilak biaprangon manderang, gitcham 2025 bilsiko watate ia gital 2026 bilsiko kusi ong·bee rimchaksotokaha.
Pangna bilsi dakronga gitan December 31 tarik walo gital bilsiko nichaksona gita Kristian bebera·giparang, an·tangtangni olakkiram nokdringrango Isolko olakkie tom·anirangko ong·atangaha aro walni 12:00 baji ong·ahaon saksa sakgipinna namgipa skanirangko on·e ia gital bilsiko rimchaksotokaha.
Apsan daken, January 1 tarik pringoba dingtang dingtang mondolirango giljarangko ka·e Isolko olakkiangtokaha aro gilja jokani ja·man dingtang dingtang songrango aro gittimrango jinma cha·rim ringrimanirangkoba dakangtokaha.
Bilsiantian January 1 aro 2 tarikrango Garo Hills-ni dingtang dingtang biaprango manderang jinma Songkritan chroke an·sengtokrongani gimin ia changoba Garo Hills-ni bang·bata biaprangon iandake manderangni jinma chrok mesae roanirangko nikna man·taiaha.
Pangna bilsian January-ni 2 tariko North Garo Hills a·jani Bangsi A·pal songo manderangni jinma tom·dake apsan Songkritan chrokanirangko nikna man·rongenga aro uandaken ia changoba ia songo manderangni jinma apsan chrok mesaaniko nikna man·taiaha. Bangsi A·pal songo jinma chrokaniko ong·atanio ua jolrango donggipa manderangsan ong·aigija Garo Hills gimikonin re·bae bak ra·paaniko nikna man·taiaha.
Ia songkritan program-ko ong·atgipa manderangni u·iatani gitade, Sukrobar pringni 9:00 bajimangon manderang, Bangsi A·pal songni kal·chakramo tom·chimongna a·bachengtokaha aro salni 12:00 bajimangode laksana batpilen manderang, ia biapona sokbatokenba, chrokanio bak ra·angtokaha.
Ia chang Bangsi A·pal songo Songkritanko ong·atanio Garo Hills-onisan ong·aigija, India a·songni gipin bakrangoni aro gipin a·songrangoniba manderang re·bae bak ra·angtokaha ine kobor on·timgiparang u·iataha.
