SHILLONG: Meghalaya- na Inner Line Permit (ILP)-ko ra·gatna dabianiko political aro civil society dolgnian bilakbatataha.
Voice of the People Party (VPP) aro Khasi Students’ Union (KSU), Meghalaya a·doko songdongkamgiparangni bil-rengsiko ripingna aro niamgri napsrukaniko champengna gita ILP-an nambatgipa chol ong·a ine aganaha.
Uandake kobor ra·timgiparang baksa agangrikmitingo VPP-ni koborna ku·wattimgipa Batskhem Myrboh, indine aganaha, “Meghalaya a·dokna ILP-ko dabianio party, bilake chadenge donga. ILP-ni gimin janapengon, gipin cholrangko ra·baskana chanchianoni ian namen dingtanga. Meghalaya-ni manderang ru·uta somoirangoni ILP-ko dabienga.
Gipin cholrangko ra·bana jotton ka·anirang dongaha indiba gipin cholrangara a·dokona manderangni napruraaniko namen dake nirokna bil dongja, uni gimin chinga ILP-kon nangnika.
Uandake KSU-ba a·doknan ILP-an nambatgipa inae aganaha.
Meghalaya-ni manderangko chelchak-naljokna gita ILP-an bilakgipa ostro gita ong·a ine KSU-ni general secretary Donald Thabah, aganaha.
Ma·mong sorkari gital niamrangko ra·bae Meghalaya a·dokona niamgri napsrukaniko champengna kam ka·na gita aganenga indiba maidakgipa niamrangko ra·bagen iani gimin talkuja. Gital ra·bana am·gipa niamrangara ILP gita bilakgipa ong·ama ong·jawa aro maidake uko ja·rikgen iarangni giminba talja.
Niatgenchimode Arunachal Pradesh, Mizoram aro Manipur a·dokrango ILP donga, ua a·dokrang namen daken niamrangko ja·rikna man·enga, apsan daken Meghalaya-oba ja·rikna man·gen ine Thabah aganaha.
KSU-ni parakani gita, Meghalaya gita chonbegipa a·doko songdongenggiparangna chelchak-naljokaniko nanga, ong·jaode a·dokni demographic-o dal·en dingtangani sokgen. Ma·mong sorkari, salgro salaram-ni gipin a·dokrangna Manipur-o man·gope ILP-ko on·aha indiode maina Meghalaya-ona on·na man·jaenga.
Iarangni gisepon Deputy Chief Minister Prestone Tynsong, Meghalaya-na ILP-ko dabianio ma·mong sorkari, ILP gitan bilakgipa gipin niamko Immigration and Foreigners Act 2025-ni niamrangko ja·rikna man·gen ine aganchakaniko u·iataha. Mejaomangmang New Delhi-o Union Home Minister Amit Shah-ko Chief Minister Conrad K Sangma-ni dilanggipa delegation gronge ILP-ni gimin agangrikaha.
